III
tida nanti bisa madjoe dân berdiri dengen tegoeh sabigitoe lama bangsa Tionghoa tida mendjoengdjoeng Khong Kauw dengen pengharga'an penoeh seperti di djeman Han Tiauw atawa Tong Tiauw.
Maka sekarang, dengen terbitken ini boekoe, kita poenja toedjoean adalah boeat kasih liat bagimana anggepannja beberapa sastrawan dan philosoof laen bangsa tentang Khong Tjoe dan peladjarannja, dan berbareng dengen itoe mengasih oendjoek dengen ringkes azas-azas dari peladjaran Khong Kauw menoeroet apa jang itoe beberapa penoelis telah fahatnken. Lebih djaoe dalem toelisannja Lionel Giles ada dibantah beberapa anggepan tida betoel dari Sinoloog sinoloog Barat jang keliroe artiken pada toedjoeannja Khong Tjoe poenja peladjaran, kakeliroean mana sering terdjadi djoega sampe sekarang dalem kalangan orang-orang jang belon fahamken Khong Kauw atawa tjoemah pereksa itoe peladjaran saliwatan sadja.
Memang betoel isinja ini boekoe ada poedjian-poedjian boeat oendjoek Khong Tjoe poenja kabesaran, tapi kita tjoemah pelik sabagian ketjil sadja dari toelisan-toelisannja itoe achli-achli-pemikir asing, sedeng dari penoelis Tionghoa kita tida masoekken sama sekalih, Toelisan dari Almarhoem Lie Kim Hok boekan berisi iapoenja boeah pikiran sendiri, hanja ada koetipan dari apa jang ditoelis oleh beberapa Sinoloog Barat, antara mana ada De Lanessan, jang djikaloe kita lida kéliroe ada bekas Gouverneur Generaal dari Indo China.
Djadinja sedeng kita sendiri tida pandang djelek pada kritiek jang mengandioeng maksoed aken menjedarken, kita poen anggep perloe aken kasih liat Khong Tjoe poenja kabesaran sabagi imbangan terhadep tindakan dari golongan jang tjoba membikin rendah dan mengetjilken peladjarannja itoe philosoof dan Goeroe dari Priboedi jang Terbesar, jang menoeroet pendapetan Lionel Giles, kadoedoekannja tjoemah boleh dibandingken dengen Buddha, Jesus dan Mohamad.
Tjitjoeroeg, 20 Juni, 1937.
K. T. H .
