— 42 —
pamerentahan negri menoeroet kainginan orang banjak, la soedah bisa singkirken itoe samatjem kaboeroekan jang biasa timboel dari lantaran adanja pendita-pendita agama jang seringkalih sesatken rahajat dan ia bikin sekalian pembesar negri, dari Keizer sampe ambtenaar jang paling rendah, menggantiken djadi panditanja rahajat. Dalem tempel-tempelnja (bionja) Khong Tjoe tida perna dilakoeken itoe kabiasa'an memetangin atawa menoedjoemin ; menjembah pada berhala-berhala poen tida di-idzinken, dan malah penjembahan pada Khong Tjoe poenja patoeng sendiri poen dimana bisa telah ditjegah, samentara kamoestian aken mendjalanken Hauw atawa berbakti pada orang toea sendiri ada djadi satoe kaoentoeogan bagi bangsa Tionghoa poenja kabedjikan moraal. Begitoelah Khong Tjoe poenja peladjaran soedah bikin bangsa Tionghoa poenja maatschappy telah berdiri dengen tegoeh dan kêkêr dalem begitoe banjak abad lamanja, dan bakal djadi satoe dari tenaga-tenaga jang paling besar dan penting boeat tjiptaken bangsa Tionghoa poenja nasif di hari komoedian.
Demikianlah ada boeah pikiran dari Njonja C. E. Couling jang télah bébér toedjoeannja peladjaran Khong Tjoe, dan maskipoen ini penoetoeran ada ringkes tapi sampe terang boeat orang beladjar kenal pada poko dasarnja jang paling penting.
Oedjar paling pengabisan dari toelisan di atas, jang bilang peladjaran Khong Tjoe bakal ambil bagian penting boeat tjiptaken bangsa Tionghoa poenja nasif di hari komoedian, sekarang moelai terboekti kabenerannja. Pamerentah Nationaal telah mendoesin jang Tiongkok tida bisa madjoe kapan peladjaran Khong Tjoe disia-sia, hingga sekarang telah timboel itoe gerakan besar boeat permoeljaken pada itoe Nabi dan siarken biar loeas peladjarannja.
