- 36 -
roe poenja poko pertengahan. Itoe atoeran examen tjara koeno di Tiongkok ada mengoendjoekken bahoea pengartian atas Khong Tjoe poenja peladjaran ajawa pengataoean jang sampoerna atas iapoenja kitab kitab ada perminta'an satoe-satoenja jang dimadjoeken pada saorang jang hendak memangkoe djabatan negri, dan Khong Tjoe sendiri soedah liwatken sabagian besar dari penghidoepannja dalem kraton radja-radja boeat tjoba pengaroehin marika soepaja djalanken pamerentahan negri dengen beres dan adil, dan tjoemah sasoedah gagal dalem ini pertjoba'an baroelah ia mengadjar moerid-moeridnja ilmoe memerentah negri.
Dari boekoe-boekoe hikajat koeno ada ternjata, bahoea berbareng dengen berbangkitnja dijnastie Chou telah moentjoel djoega, maski dengen perlahan, pemisahan pada itoe pikiran koeno di Tiongkok. Bagian jang paling besar, jang anggepannja mirip dengen Taoisme, ada dojong pada poko peladjaran jang berlakoe di djeman dijnastie Shang, samentara bagian jang ketjilan, tapi komoedian ternjata ada lebih penting, telah disetoedjoei oleh Khong Tjoe, jang soedah bekerdja banjak sekalih boeat bikin djadi lebih sampoerna. Khong Tjoe ada sanget kagoemin pada kapandean dan priboedinja Chou Kung jang ia djadiken sabagi model atawa tjonto.
Pada djemannja Khong Tioe, Tiongkok ada dalem kakaloetan besar; Centraal Gouvernement ada lemah dan radja-radja ketjil selaloe riboet bermoesoehan satoe sama laen. Aken semboehken penjakit dari itoe djeman kaloet Khong Tjoe poedjiken pendidikan, boekan pendidikan oemoem goena samoea rahajat, hanja pada sagolongan orang-orang jang soedah terpilih, dan malah ini orang-orang jang terpilih poen aken terima didiknnja jang pertama dalem pakerdja'an sabagi pegawe negri.
Ini pikiran dari Khong Tjoe achirnja telah disetoe-djoein, tapi boekan tida dapet lawanan sengit dari fihaknja laen-laen achli pemikir jang djadi saingannja.
