Halaman:Kabesarannja Khong Hoe Tjoe.pdf/44

Dari Wikisumber bahasa Indonesia, perpustakaan bebas
Halaman ini tervalidasi

OLEH NJONJA C. E. COULING

DALEM ENG. SINICA.

Dalem ini artikel Njonja Couling boekan sadja membitjaraken poko peladjaran dari Khong Tjoe, tapi djoega ia ada roendingin itoe soeal jang dari doeloe rame dibitjaraken, apa Khong Kauw tjoemah satoe philosofie, atawa satoe agama. Dalem tempo belakangan, berhoeboeng dengen itoe pergerakan besar di Tiongkok boeat memadjoeken Khong Kauw, kembali beberapa orang ternama, antara mana ada djoega Mr. Wang Ching Wei, telah menjataken Khong Kauw ada satoe peladjaran moraal tapi boekan agama. Berhoeboeng dengen koekoehnja, ini anggepan maka kita rasa ada penting aken orang taro perhatian pada apa jang Njonja Couling bilang dalem iapoenja toelisan tentang Confucianisme jang kita salin di bawah ini, - K. T . H).

Confucianisme atawa Khong Khauw ada sakoempoelan peladjaran-peladjaran Nabi- nabi koeno di Tiong­kok, jang komoedian dikoempoel dan dipilih oleh Khong Tjoe, jang poedji dan siarken delem iaponja pengadjaran dan toeladan, lantes ditoetoerken oleh moerid-moeridnja jang paling deket, dikoempoel dan dipersatoeken oleh Mencius (Bing Tjoe), dan diwoedjoetken dalem ka'ada'an seperti jang tertampak se­karang oleh Chu Hsi, serta sampe di ini sa'at tinggal mendjadi satoe kapertjaja'an atawa penganoetan dari bangsa Tionghoa.

Khong Kauw ada diseboet dengen berbareng sabagi satoe agama dan satoe philosofie. Kabanjekan toekang kritiek bangsa asing, dan djoega beberapa orang Tiong­hoa, telah menolak boeat akkoein Khong Kauw sabagi satoe agama, kerna sasoenggoenja djoega kaloe itoe „agama" maoe diartiken satjara kapertjaja'an Barat memang Confucianisme ada laen djaoe, kerna Khong Tjoe menentangin pada kapertjaja'an atas adanja satoe Allah persoonlijk jang beroepa sabagi pemimpin manoesia ; djoega Khong Tjoe tida pernah goenaken dowa-dowa, katjoeali boeat „memberi kabar" pada roh-roh dari kake-mojang atas kadjadian-kadjadian

-34-