— 29 —
disimpen sèperti emas dalem pikirannja rahajat. Di atas dari samoea iapoenja toeladan ada bersinar seperti api taboenan besar jang bergoemilang, todjoken tjahajanja dalem itoe malem jang gelap goelita dari kasangsara'an, penindesan dan peperangan soedara, jang ia dengen sia-sia soedah bergoelet boeat berentiken.
Dengen begitoe mendjadi ternjata bahoea Khóng Tjoe poenja anggepan, atas harganja kabaekan dalem diri manoesia goena memberi toeladan jang pengaroehken oeroesan negri, achirnja bisa djoega diboektiken kabenerannja ; itoe tjonto jang besar dan bersoemanget aken menjelamatken rahajat, jang ia soedah tjari dengen sia-sia antara radja radja dalem iapoenja djeman, achirnja telah kadapetan djoega di dalem Khong Tjoe poenja diri sendiri, jang adà djadi sabagi „radja tida bermakota," jang selamanja tinggal bertachta dalem hatinja iapoenja sasama bangsa.
Maka soenggoe tida masoek di akal aken membilang Khong Tjoe poenja penghidoepan ada satoe „kagagalan." Dioekoer dari kasoedahannja, Khong Tjoe poenja penghidoepan ada teritoeng jang paling berhatsil jang pernah didapet oleh satoe manoesia. Sasoedah ia meninggal, iapoenja pengaroeh berdjalan teroes dengen tida bisa ditjegah, dan iapoenja peladjeren telah memberi hatsil-hatsil begitoe besar jang tadinja tida bisa didoega dan tida saorang bisa taksir sampe dimana loeasnja.
Tjoemah ada tiga orang laen, dan tida lebih dari tiga, jang bisa bandingin Khong Tjoe poenja pengaroeh jang loeas dalem doenia, jaitoe ; Gautama poenja pengorbanan aken mendjelma di antara manoesia, penghidoepan jang penoeh gontjangan dan pergoeletan dari Nabi Mohammad, dan Jesus Kristus poenja taon-taon penghidoepan jang bersih dari kadosa'an dan berachir di Golgotha.
***
Demikianlah ada pendapetannja Lionel Giles tentang Khong Tjoe.
