Halaman:Kabesarannja Khong Hoe Tjoe.pdf/35

Dari Wikisumber bahasa Indonesia, perpustakaan bebas
Halaman ini tervalidasi

-25-

djadi gampang boeat diliat bagimana itoe perkata'an Li, sabagi sifat jang ada dalem pikiran manusia, telah dapetken ispoenja berbagi-bagi tingkat dan artian : dari katjotjokaa dalem soemanget jang mengandjoerin perboeatan jang berdasar 'atas toedjoean jang sawadjarnja, sampe mengenaken djoega atoeran sopan dan boedi bahasa manis serta tingkah-lakoe jang baek. Ini satnoea ada perloe boeat bikin itoe segala oeroesan jang koerang penting, seperti perhoeboengan antara manoesia dengen manoesia, djadi berdjalan serba rapih dan beres, dengen bérdasar pada Li, jaitoe wetatawa „atoeran dari kapahtesan."

Kombali dalem kalangan familie Khong Tjoe dapetken ada bekerdja itoe tenaga natuur jang ia rasa bisa dipake sabagi andjoeran soepaja manoesia menjinta pada kabedjikan. Itoe „tenaga natuur" ada beroepa kasoekaan boeat tiroe-meniroe. Lantaran mendapet taoe bahoea toeladan dari perboeatannja sediri ada tjara jang paling berhasil aken satoe ajah mengadjar pada anak-anaknja apa jang baek dan bener, maka dengen tida bersangsi lagi ia memberi kapastian bahoea itoe matjem pengaroeh poen bisa digoenaken oleh satoe radja, dan malah soedah madjoe begitoe djaoe boeat membilang, djikaloe jang djadi radja Beilakoe bener, iapoenja rahajat aken djalanken kawadjibannja zonder koedoe diperentah lagi ; kapan itoe radja tidâ berlakoe bener, rahajatnja tida aken meuoe« roet biar diperentah bagimana djoega. „Kabedjikan dari satoe radja," kata Khong Tjoe, „ada seperti itoe angin, dan iapoenja rahajat ada sabagi roempoet. Ada tabeatnja roempoet aken bertoendoek kapan sadja itoe angin menioep."

Boleh djadi dalem ini satoe soeal Khong Tjoe telah taro kapertjaja'an terlaloe besar pada pengaroehnja toeladan, hingga anggepannja melèsèt djaoe dari kaada'an jang sabenernja. Maski begitoe tida bisa dibi­lang adil aken dasarken kita-orang poenja pertimbangan atas negeri-negri democratisch dari djaman sekarang,