— 66 —
saorang baek dan menoentoet penghidoepan jang pantas. Dengen begitoe . . . . biar poen . . . . . . . . . . . . . . . a — koe mati djoega, akoe poe . . . . . . . . . . . . . . . nja . . . . . . . . . . . . . . . roh . . . . . . . . . . . . . . .“
Lim-sie tida bisa tamatken iapoenja pembitjarahan sebab iapoenja roh soeda meninggalken iapoenja raga brangkat ka rachmat' toellah.
Lauw Soe Sam koetika mendenger iboenja poenja, omongan jang paling achir, jang dioetjapken dengen perkatahan begitoe mengharoeken, lantas menangis keras sembari mameloekin iboenja poenja mait, dan dalem bebrapa sa'at lamanja ia sabagi djoega orang jang lenglang. Achirnja ia dibikin sedar oleh iapoenja bebrapa tetangga jang memboedjoek padanja dengen lemah lemboet. serta kasi pikiran soepaja ia mengoeroes maitnja iapoenja iboe. Achir achir Lauw Soe Sam bisa djoega tahan iapoenja pengrasahan sedih, laloe ia preksa peti iboenja ternjata sekali poen ia soeda tjoeriin dengen menoentoetan, sang iboe masi bisa menjimpen sadjoembla oewang dan barang permata jang besar djoega djoemblanja. Laloe ia ambil bebrapa ratoes tail perak, pergi membeli peti mati dan segala kaperloean boewat mengoeroes orang jang mati.
Sapandjang kamatian iboenja iapoenja kawan-kawan berdjoedi, lantaran mendenger kabar Lauw Soe Sam masi mempoenjai banjak oeang tetinggalannja iapoenja iboe, semoeanja pada dateng menjataken marika poenja pengrasahan doeka jang palsoe belaka, tapi sabetoelnja iaorang maoe mentjari lagi koetika boeat pantjing soepaja Lauw Soe Sam berdjoedi lagi. Salah satoe di antaranja, To Koen, satoe boeaja djoedi jang soeda oeloeng, kasi pikiran soepaja Lauw Soe Sam koempoelken orang berdjoedi dalem roemahnja, sapandjang peti matinja iapoenja iboe belon dikoeboer
