- 57 -
laporan ini atawa itoe, atawa poen ditegor pergi dateng. Tegesnja ia ingin satoe kali oeroesan dipasrahken dalem iapoenja tangan, ia maoe bekerdja dengen tida terganggoe sampe temponja satoe boelan soeda tjoekoep.“
Itoe tjongtok berpikir bebrapa sa'at lamanja, kamoedian ia ambil satoe poetoesan pasti sembari berkata: „Tida apa, itoe permintahan kita boleh trima sadja, tjoema fihak politie poen tida halangan bikin pendjagahan jang perloe djangan sampe itoe pendjahat bisa berboeat sesoekanja dengen tida terhalang sama sekali.“
Tan Tjoe Sim berlaloe dari kantoornja tjongtok dengen pengrasahan girang, kerna iapoenja permintahan telah diloeloesken. Sesampenja dalem iapoenja kantoor sendiri lantas sadja ia panggil mengadep Tio Beng jang menoenggoein iapoenja kabar.
„Tio tjongsoe, akoe mengasi kabar baek pada kaoe,“ kata Tan Tjoe Sim pada Tio Beng, tjongtok taydjin telah trima seanteronja kaoe poenja perdjandjian itoe. Akoe mengharep sadja soepaja tjongsoe dan kawan-kawan bisa lakoeken itoe pakerdjahan dengen berhasil, agar pendoedoek ini kota bisa terbebas dari ganggoeannja itoe begal, sedeng tjongsoe sendiri poen bisa membales itoe sakit hati heibat terhadep pada itoe penjamoen boewas“
„Akoe aken bakerdja dengen seantero tenaga dan pikiran boeat menangkep pada itoe binatang It Kie Tho,“ kata Tio Beng, „tapi begimana hasilnja itoelah terserah pada Ihian jang maha koewasa. Tapi ada soeatoe hal jang akoe maoe minta lagi toaloya poenja bantoean, oleh kerna dikoewatir It Kie Tho maboer ka laen bilangan, maka akoe perloe mendapet toaloya poenja satoe soerat dienst jang mengasi kekoewasahan
