perlawanan sabisanja, tida oeroeng ia kena diloekain di bebrapa banjak tempat, hingga terpaksa ia moesti liatin sadja itoe pio dirampas oleh itoe begal jang mengakoe bernama It Kie Tho.
Lebih djaoe It Kie Tho ada pesen omongan soepaja disampeken pada Tio Beng begini : „Kasi taoe pada kaoe poenja madjikan, itoe andjing Tio Beng, akoe sengadja rampas iapoenja pio, pertama boeat bikin iapoenja pakerdjahan mendjadi roesak, kadoea maoe paksa soepaja ia dateng menjoesoel padakoe, soepaja ia bikin peritoengan atas iapoenja perboeatan terkoetoek terhadep pada akoe poenja Goei toako. Kaloe Tio Beng maoe menjoesoel padakoe, bilang sadja ia soepaja dateng ka sini, dan akoe aken toenggoe ianja sampe satoe boelan moelai teritoeng dari ini hari.“
Bisa dimengarti bagimana Tio Beng poenja goesar, biar poen iapoenja loeka di poendak masi belon semboe betoel, lantas sadja ia bikin persidiahan boeat pergi ka Pok-bong-tjoen, jang terletak disabelah bawahnja boekit Hok-gioe-san, dalem bilangan Boen-tjioe, tempat di mana itoe perampokan telah terdjadi, dan di mana itoe penjamoen tangtangin soepaja Tio Beng dateng menjoesoel. Kabetoelan itoe waktoe Oei Ban Seng berada dalem piokiok, maka ia tawarken diri boeat menganterken chefnja pergi ka itoe tempat.
Tio Beng satoedjoe, malah ia adjakin djoega bebrapa toekang popio dari piokiok laen boeat sama-sama pergi ka sana. Oleh kerna It Kie Tho ada mendjadi moesoeh oemoem boeat semoea piokiok, soeda tentoe sadja itoe bebrapa toekang popio jang diadjak menjataken satoedjoe boeat sama-sama pergi ka Pok-bong-tjoen.
