- 48 -
dengen begitoe, sekali poen kemoedian ia bisa ditoeloengin oleh kawan kawannja, tida nanti bisa membahajaken lagi keamanannja negri.
Itoe kepala oppas politie tjeritaken itoe oeroesan pada advisuurnja itoe soenboe, siapa sampeken lagi pada itoe soenboe sendiri. Itoe soenboe timbang hal itoe ada banjak baeknja boewat mendjaga djangan sampe Goei Soei Hong bisa ditoeloengin oleh iapoenja kontjo-kontjo, sebab kaloe soeda djadi tjatjat begitoe roepa, taro kata bisa ditoeloengin oleh iapoenja kontjo-kontjo djoega, sama sekali tida membahajaken, maka advies itoe lantas ditoeroet.
Blakangan pada sasoedanja Tio Beng berlaloe dari Thaygoan, dengen sasoenggoenja djoega, dengen berkontjo sama bebrapa perampok, It Kie Tho tjoba dateng ka dalem pendjara iboe kota sansee, tapi Goei Soei Hong berada dalem kaadahan begitoe roepa, taro kata bisa dibawa pergi djoega, soeda tida ada goenanja sama sekali, apapoela itoe rante jang ditoesoekin ka dalem itoe pendjahat poenja toelang poendak soeker sekali boewat dilepasken, hingga It Kie Tho dan kontjo-kontjo berlaloe dari itoe pendjara dengen tangan kosong dan pengrashan jang sangat mendongkol.
Ouw Koei Boen alias It Kie Tho djadi sangat goesar pada Tio Beng, sebab ia doega pasti bahoewa itoe perboewatan atas dirinja Goei Soei Hong, tentoelah ada atas adviesnja Tio Beng. Maka ia berniat keras boewat bikin pembalesan pada Tio Beng. Begitoelah bersama iapoenja bebarpa kawan, dengen terpentjar di segala djoeroesan, iaorang sengadja merampas pionja Ho Sin Piokiok, hingga dalem sedikit waktoe sadja, merknja Ho Sin Piokiok djadi terdjeroemoes ka dalem pertjomberan. Sebab, sebagi
