- 42 -
madjoe lebih kanan sedikit sadja, nistjaja aken membikin poetoes oerat poendaknja, dan boeat selama-lamanja Tio Beng aken mendjadi tjatjat.
„Hahaha! achir-achir kaoe rasaken djoega lihaynja akoe poenja tipoe hwee ma to,“ kata It Kie Tho sembari tertawa bergelak gelak.
Sembari berkata begitoe, ia teroes mendesek sama iapoenja golok, tjetjer itoe toekang popio dari segala djoeroesan dengen seroeh. Tio Beng sekali poen rasaken iapoenja poendak kiri sanget sakit, tapi sama sekali tida mengeloewarken rintihan barang satoe pata, sembari selitken iapoenja tangan kiri ka dalem iapoenja tali pinggang, dengen gaga ia tangkis semoea serangannja It Kie Tho, hingga soeda membikin itoe pendjahat djadi merasa sanget kagoem atas kagagahan dan katetepan hatinja itoe toekang popio.
Tjoema sadja biar poen Tio Beng bisa membelaken dirinja dengen baek, toch lantaran poendak kirinja sanget sakit, lama-lama ia djadi kateter djoega. Beroentoeng pada sabelonnja keada'an djadi samingkin heibat, Lioe Kie Boe dan Lioe Kie Giap soeda beroentoeng bisa roeboehken Goei Soei Hong.
„Ringkoes padanja, hiantee,“ berseroeh sang engko, „akoe maoe pergi membantoein pada Tio toako jang kaliatannja telah mendapet loeka dan sekarang djoestroe didesek oleh itoe pendjahat It Kie Tho.“
Sahabisnja berkata begitoe, lantas sadja Lioe Kie Boe lontjat manerdjang pada It Kie Tho soepaja mengasi koetika pada Tio Beng djangan terlaloe didesek. It Kie Tho melawan pada itoe doewa orang dengen tida merasa takoet barang sedikit, sebab ia soeda mendapet kanjatahan bahoewa kadoea soedara
