Halaman:Indjil MATTHEOES.pdf/68

njaoet sama dia dari satoe perkataan, sampe adipati itoe djadi heiran sakali.
15 {Mar 15:6; Luk 23:17; Yoh 18:39} Maka adipati memang biasa kapan hari-besar kasih lepas satoe orang jang tertoetoep, sasoekanja orang banjak.
16 {Mar 15:7; Luk 13:19; Yoh 18:40} Maka pada koetika itoe dia-orang ada satoe orang tertoetoep, jang ternama boesoek, Barabbas namanja.
17 Maka kapan dia-orang ada berkoempoel Pilatoes berkata padanja: Siapatah jang kamoe maoe akoe lepasken, Barabbas atawa Jesoes, jang terseboet Kristoes?
18 Karna adipati taoe jang dia-orang soedah menjerahken Toehan dari panas-hati.
19 Maka kapan dia doedoek dikrosi bitjara, lantas bininja soeroehan sama dia, katanja: Djanganlah tjampoerken dirimoe dalem perkaranja ini orang jang betoel; karna pada ini hari akoe soesah sakali dalem mimpi dari sebab itoe orang.
20 {Mat 15:11; Luk 23:18; Yoh 18:40; Kis 3:14} Tetapi segala kapala imam dan orang toewa-toewa soedah mengadjak sama orang banjak itoe, bijar dia-orang minta dapet Barabbas, dan bijar Jesoes diboenoeh.
21 Maka adipati menjaoet dan berkata padanja: Sipaja dari ini doewa orang kamoe maoe jang akoe lepasken padamoe? Maka kata dia-orang: Barabbas.
22 Pilatoes berkata sama dia-orang: Lantas akoe nanti boewat apa sama Jesoes, jang terseboet Kristoes? Dia-orang samowa berkata sama dia: Bijarlah dia {Disalibken = dipendang} disalibken!
23 Tetapi kata adipati: Dia soedah boewat djahat apa? Maka dia-orang mangkin betrejak, katanja: Bijarlah dia disalibken!
24 Maka kapan Pilatoes melihat jang tidak toeloeng lagi, melainken mangkin djadi roesoeh, lantas dia ambil ajer dan tjoetji tangannja dihadepan orang banjak, katanja: Akoe ini soetji dari darahnja ini orang jang betoel; kamoe bolih tanggoeng.
25 Maka sagenep kaoem itoe menjaoet, katanja: Bijar {Kis 5:28} darahnja djatoh sama kita-orang dan sama anak-tjoetjoe kita!
26 Pada koetika itoe Pilatoes melepasken Barabbas sama dia-orang, tetapi habis menjapoe Jesoes, dia menjerahken Toehan sopaja disalibken.
27 {Mar 15:16; Yoh 19:2} Koetika itoe pradjoeritnja adipati ambil sama Jesoes sertanja dalem roemah bitjara serta dia-orang koempoelken sagenep pasoekan deket sama Toehan.
28 Maka kapan dia-orang soedah memboeka pakejannja, lantas kasih pake sama Toehan satoe badjoe jang woengoe warnanja.
29 Dan habis menganjamken satoe {Makota = topi radja} makota dari doeri, dia-orang taroh dia di-atas kapala Toehan, dan satoe toengkat boeloeh dalem tangannja kanan; lantas dia-orang soedjoed dihadepannja serta sindirken sama