Halaman:Hikajat Khonghoetjoe.pdf/88

Dari Wikisumber bahasa Indonesia, perpustakaan bebas
Halaman ini telah diuji baca

— 84 —

„Kaloe kaoe dengar orang poedji saorang besar, saorang ponggawa jang paham, atawa saorang berhati baik, kendati dija ini hidoep di djeman mana atawa di tanah mana poen, biarlah kaoe berkata pada diri sendiri: „ „akoe maoe goenaken segala kamampoeänkoe, soepaja akoe mendapatken hak aken orang bitjara bagitoe dari hal akoe.”” — Sabaliknja kaloe kaoe dengar orang bitjara djelek atas hal orang lain, orang tjelah kalakoeännja, atawa kataken boesoek perboewatannja orang lain itoe, biarlah kaoe berpikir dan berkata pada diri sendiri: „ „brangkali akoe sendiri ada membri djoega lantaran, aken orang tjelah dan omongi akoe bagitoe roepa; akoe maoe goenaken segala daja-oepaja aken perbaiki dirikoe, dan dengan kalakoean jang tida bernoda, hanja poetih-beresih, akoe maoe bri kanjataän, jang lidah djahat tida ada poenja lantaran aken tjelah dan hinaken akoe.””

Di antara moerid-moeridnja KHONGTJOE adalah orang-orang dari roepa-roepa deradjat, dan dari antara marika itoe melinken ada doewabelas orang jang salamanja ada beserta KHONGTJOE: moerid-moerid jang lain, melinken datang sadja terkadang-kadang aken dengar KHONGTJOE poenja pengadjaran; tapi maski bagitoe, samoewa poen ada menoeroet betoel dan melakoeken adjarannja KHONGTJOE. Masing-masing moerid ini ada tinggal di roemah sendiri; tapi sedang bagitoe, ija-orang ada terdjaga oleh goeroenja, jang merasa wadjib sekali melihat-lihat ija-orang poenja kalakoeän, soepaja boleh toentoen dan antarken ija-orang ka atas djalan kabenaran, kaloe ija-orang tersesat dari djalanan itoe. Sang moerid-moerid poen tiada berboewat satoe apa jang boleh dikataken perkara besar, kaloe ija-orang belon minta pikirannja KHONGTJOE atas perkara itoe. Lain dari bagitoe, tempo-tempo ija-orang tjeritaken pada KHONGTJOE, apa jang