— 74 —
atoeran, atawa orang jang soeka mengomong banjak; kerna maskipoen ada ampoenja kabisaän apa djoega, orang-orang bagitoe tida boleh dipake di dalam pakerdjaän pemerintah.
Sasoedah bitjara lama sedikit, KHONGTJOE lantas berkata, bahoewa segala hal jang telah dikataken olehnja itoe, telah diseboet sadja dengan pendek, dan kaloe baginda berpikir-pikir dengan baik atas hal itoe, baginda nanti dapatken sendiri, apa jang ija (KHONGTJOE) soedah tida brani kataken, dari sebab takoet nanti djadi poetoesken kasabaran dan membri rasa kesal pada baginda. Baginda lantas berkata:
Nanti membri rasa kesal padakoe! padakoe ini jang amat soeka dengari bitjaramoe! Moestahil amat boleh djadi bagitoe! Segala bitjaramoe ada djadi pengadjaran dan peladjaran jang bergoena sekali aken dirikoe ini; kerna sadari ketjil akoe ini ada di antara orang-orang prampoewan sadja, dan tida taoe apa jang akoe haroes taoe. Lain dari jang ada di dalam karatonkoe, akoe tiada kenal. Sahari-hari akoe bersoeka-soeka di dalam astana, dan akoe berboewat itoe tiada dengan merasa kesal atawa merasa enak. Akoe tida taoe apa adanja kasedihan atawa kadoekaän, apa adanja tjape, takoet atawa bahaja. Sedang bagitoe, sering-sering akoe merasa dengar perkataan-perkataän itoe; tapi ija tida termasoek ka dalam hatikoe, dan tiada sekali menerbitken pikiran apa-apa padakoe. Apa kaoe tida bisa briken padakoe satoe daja-oepaja, jang akoe boleh dapat trima dengan gampang dan jang menjataken itoe samoewa dengan terang kapadakoe, soepaja akoe dapat mengarti dengan betoel, apa jang orang hendak bilang, kaloe orang seboet hal itoe, dan lagi soepaja akoe terlepas dari itoe samoewa, kaloe djahat adanja, atawa akoe mendapat samoewa itoe, kaloe baik adanja "
KHONGTJOE memanggoet, laloe berkata: ,,Hamba nanti toeroet titah toewankoe. Djikaloe toewankoe djalan menoedjoe
