59
— »Apatah sekarang, jang akoe misti perboewat?”
— »Akoe ’mana taoe? Itoe boekan perkarakoe! Boekan akoe jang tjintai nona Mercedes, hanja kaoe. — Indjil berkata: tjarilah, dan kaoe nanti mendapat.”
— »Akoe soedah dapat. . . . .”
— »Dapat apa?”
— »Dapat ingatan aken boenoeh Edmond Dantes; tapi Mercedes telah bilang padakoe, jang djikaloe toendangannja djadi binasa, ia nanti memboenoeh diri.”
— »Ach! orang bilang sadja bagitoe, tapi orang tiada nanti berboewat bagitoe.”
— »Kaoe tiada kenal adatnja Mercedes, Toewan! kaloe ia soedah mengantjam, ia nanti lakoeken djoega antjamannja itoe.”
»Hm!” kata Danglars di hati: »apa itoe prampoewan memboenoeh diri atawa tida, itoelah akoe tida perdoeli, kaloe sadja Dantes tiada djadi kapitein.
Sedang bagitoe, Fernand berkata aken teroesken omongannja: »Dan pada sabelon Mercedes mati, akoe nanti boenoeh dirikoe sendiri.”
»Ha! itoelah satoe katjintaän jang benar!” kata Caderousse dengan triak sabiasanja orang mabok: »kaloe boekan, maka njatalah akoe ini tiada taoe a, a adanja katjintaän!”
»Akoe rasa,” kata Danglars pada Fernand: »kaoe ini satoe lelaki baik; akoe merasa ingin bisa toelengi kaoe, tapi. . . . . .”
