„DIA . . . .”
Satoe kabroentoengan jang dateng dengen tida terdoega.
Tidalah heran, Kim-djin berboeat sabisanja boeat bikin itoe iboe dan anak djadi merasa senang dan girang. Segala apa ia toendjoeken pada marika. dan di waktoe membri katerangan ia membri kenjata’an, bahoewa ia mempoenjai pengatahoean dalem banjak hal. Banjak barang jang diliat oleh itoe iboe dan anak, tentoe tida aken dimengarti oleh marika, djikaloe itoe waktoe marika tida dapet katerangan-katerangan dari Kim-djin.
Bagitoelah, maski baroe berkenalan, Kim-djin dan Siok-nio soeda bertoekeran perkata’an banjak sekali, dan lantaran tjaranja itoe orang moeda membri katerangan, ia poenja gerak-gerakan jang gesit, ia poenja sikap jang menghormat, membikin iboenja Siok-nio jang-tadinja bilang tjape, djadi tida rasaken lelah atawa pegal kaki, dan tempo kembang api soeda dipasang, baroelah itoe iboe dan anak ingat jang itoe waktoe soeda djaoeh malem dan marika moesti poelang.
Kim-djin poen njataken hendak lantes berlaloe, sebab ia tida boleh bergadang sampe terlaloe malem.
la tjari satoe taxi dan waktoe iboenja Siok-nio seboet di mana ia poenja tempat tinggal, dengen lantes Kim-djin berkata:
„O, djikaloe bagitoe akoe boleh ikoet kaoe, akoe poen moesti liwatin itoe djalanan.”
13
