CHRITA ORANG YANG CHARI SLAMAT.
FASAL 1.
DERI-HAL SI KRISTIAN.
Bila sahya berjalan di dalam hutan, sahya datang dkat satu lobang di tanah, dan berbaring mau tidor. Waktu sahya lagi tidor sahya bermimpi satu mimpi, dan dalam itu mimpi sahya tengok satu orang yang pakai pakaian burok. Dia berdiri dkat rumah-nya, ttapi sahya rasa sperti dia mau tinggalkan itu rumah, kerna itu rumah di blakang-nya. Dalam tangan-nya dia pegang satu buku, dan dia ada pikul satu pikulan yang brat.[1]
Sahya tengok dalam sahya punya mimpi itu orang ada bacha itu buku, dan waktu dia bacha dia mnangis, dan mngglitar sbab takot. T'ada brapa lama lagi itu orang bertriak kuat-kuat, "Apa sahya msti buat?"[2]
Dngan itu macham susah hati dia pulang, ttapi dia tahankan dia punya susah dngan s-boleh-boleh-nya spaya jangan anak-bini-nya tahu. Lama-lama bertambah-tambah susah-nya, sampai dia msti chakap juga. "Wah, chlaka sahya ini," dia kata sama anak-bini-nya, " tntu sahya nanti binasa sbab satu pikulan yang terlalu brat yang sahya ada tanggong. [3]
Dan lagi orang sudah bilang sama sahya yang negri kita tinggal ini tntu nanti hangus, kerna api mau turun deri
