Untuak nagari untuak Ustano
Sabagai pulo itu garan
Labiah sanang tu hati kami
Kok sampai naiak rang mudo
Kapado anak rajo kami
Dek indak bakandak di hati kami
Inyo nan kawin nanti
Iyo jo Sutan Lembak Tuah
Kok tajadi nan bak itu
Iyo buayo mangguangguang bungo
Harimau mangguangguang nun kayangan
Banyak kami nan indak suko
Iyolah kami rakyatko
Ka ibo bana hati kami
Jokok tajadi nan bak kian
"Baitu kato mamak dubalang
Sananglah hati mandangakan
Tapi tarimo juo iko
Pambali pisang untuak rang rumah
Tando Mamak datang dari Kajai
Bukan suok iko Mamak
Indak doh Mamak ambo bali
Indak tabayia budi Mamak
lyo dek pitih saketekko
Di masuakkan si Bujang itu garan
Pitih kadalam saku baju
Dinaiakkannyo yo si Payuang
Kaateh Pungguang Hitam Manih
Inyo pun duduak di balakang
Urang tingga maliek sajo
Indak ado nan managua
Indak ado nan malarang
Tapanca tangih Bidasari
71
