X.
Itoe kembang kaso.
Di tegalan dan boekit-boekit, dimana toemboe kaso atawa alang-alang,
Ada tertampak pemandangan indah jang membikin terharoenja sang hati;
Di itoe boelan Djiegwe atawa Maart, poehoen kaso sedeng berkembang,
Jang matjemnja pandjang dan lantjip seperti boeloe, berwarna poetih.
Satiap hari Tjengbeng, kaloe orang pergi ka koeboeran aken sembahjang,
Serta tengok tempat pesareannja familie dan sobat-sobat jang tertjinta,
Itoe kembang kaso di sapoeter koeboeran tertioep angin bergojang-gojang,
Seperti djoega marika toeroet membri hormat dan oendjoek doeka-tjita.
Oh, alang-alang atawa kaso, tetoemboean jang oleh banjak orang dibentji,
Dengen kembangmoe jang tida berbaoe haroem serta bersifat saderhana!
Dimana kaoe moeltjoel toekang kebon merengoet, menjomel dan menjatji,
Lantaran marika anggep kaoe sabagi tetaneman jang paling tida bergoena.
Maski begitoe kaoe djalanken kawadjibanmoe dengen setia, kembang kaso!
Saban hari raja Tjengbeng selaloe kaoe kasih oendjoek kaoe poenja roepa.
Kaoe toeroet meriasken itoe goendoekan tanah tempat manoesia mengaso,
Maskipoen jang oleh sekalian sobat dan familienja soedah lama diloepa.
Itoe krans-krans indah jang anter peti-mati waktoe dibawa ka koeboeran,
Itoe lian-lian dari soetra jang mahal harganja serta bergilang-goemilang,
Ach! itoe semoea kaindahan dan kareboan tjoemah tertampak sabentaran,
Semoea aken linjap.... terganti oleh kembangnja roempoet alang-alang!
Begitoelah djoega djalannja penghidoepan manoesia di dalam doenia fana,
Apa jang orang paling hargaken dan harepken gampang linjap kombali;
Jang tinggal tetep dan kekel, melinken jang sifatnja paling saderhana,
jang tida gampang mengiser dari djalanan jang satoe kalih soedah dipilih.
30
XI.
Oleh-lio....!
OLEH O.T.N. BATAVIA.
Waktoe Tjing Beng saja pergi di koeboeran aken te-tjwa,
Dimana saja telah lintasin sawah-sawah padi dan rawa;
Dari sablah blakang ada mendatengin satoe anak angon,
Jang, satelah tjaboet batang padi, naek ka satoe ranggon,
Dari mana ia bersedia boeat toeloeng pada itoe oleh-lio,
Jang sebagi mati telah terletak di tangannja si Kario
Jalah itoe anak angon, jang laloe moelai tjoba menioep
Di lobangnja itoe oleh-lio jang ampir lajoe dan koentjoep;
Komoedian, lambat dan aloes kadengeran soeara berboenji
Dari itoe oleh-lio, sebagi soearanja padi jang bernjanji;
Begitoelah sateroesnja ka'ada'an di itoe bagian dari sawa,
Djika Kario brenti, baroe terasa itoe padi tida bernjawa;
Itoe soeara jang begitoe merdoe, baroe teges tertjipta
Dan bersoekma, djika ditioep oleh Kario jang menjinta.
***
Tah, begitoelah saja sanget bersoekoer serta bergirang,
Djika saja berasa sebagi mati di genggemannja Allah.
Begitoelah, sebagi itoe oleh-lio jang didjadiken soeling,
Di waktoe berdiam di tempat soenji saja poenja sarang,
Saja rasaken napasnja Thian jang dengan tertamat ridlah
Membilang: „Di blakang roegi, oentoeng besar berpaling".
31
