Lompat ke isi

Halaman:Boekoe tjerita Sam Kok (Jilid ke 49-55).pdf/525

Dari Wikisumber bahasa Indonesia, perpustakaan bebas
Halaman ini telah diuji baca
— 4439 —

Pauw bersama balatentaranja bantoe melabrak dari sebla depan.

Di sitoelah soldadoe Goel dapet karoesakan besar sekali, oleh kerna laorang diserang dan digentjet tjara begitoe Kwee Hoaij dan Soen Lee lantas melariken diri, dan koetika meliat djalanan jang iaorang hendak liwatin ada terlaloe soeker dan memboelak-biloek di boekit-boekit, sigralah djoega marika toeroen dari koedanja dan laloe teroesken perdjalannannja lebi djaoe dengen saparo merambat.

Thio Pauw dapet liat begimana itoe doea pemboeronan berlakoe di itoe waktoe, dan dari sebab pikir boeat tangkep itoe doea pemeratan boekan ada perkara soesa, maka tida tempo lagi ini djedjaka lantas lepas koedanja boeat mengedjer pada marika itoe.

Tapi salagi Thio Pauw meliwat di tepi soeatoe djoerang, apa tjilaka koeda-toenggangnja terpleset, hingga ia dan itoe binatang sama-sama mendjeroenoek tertjeboer ka dalem djoerang itoe.

Banjak orang lantas dateng menoeloeng, tapi kapalanja itoe djedjaka telah petja kapoekoel batoe. Khong Beng sigra prenta orang anter Thio Pauw poelang ka kota Seng Touw boeat berobat.

Dengen begitoe Kwee Hoaij dan Soen Lee djadi terlepas dari pengedjerannja itoe djedjaka dan achir-achir bisa balik kombali ka pasanggrahannja Soe-Ma le.