Beng lantas prenta koelawarganja Hok Tjiauw bawa poelang peti-maitnja ini panglima almarhoem ka negri Goei.
Disini ada ternjata, sasoeda kaloearken ilmoe siloeman, itoe ferdana mantri bisa berlakoe djoega seperti nabi-nabi jang moera hati.
Sasoedanja oendjoek itoe kamoerahan hati pada koelawarganja Hok Tjiauw, Khong Beng laloe berkata poela pada Goei Jan dan Kiang Wie:
„Kau berdoea djangan lepas doeloe pakean perang, hanja bawalah sekarang djoega itoe balatentara boeat poekoel kota San Koan, kerna kaloe moesoe jang mendjaga itoe kota dapet taoe ini perkara, dengen katakoetan tentoe iaorang lantas melariken diri. Hajo, djangan ajal! Sebab djika kau berlakoe lambat sedikit sadja, nistjaja kau nanti sampe di sana kablakangan dari moesoe poenja bala penoeloeng, hal jang mana boleh menbikin itoe kota tiada begitoe gampang bisa dapat diambil.”
Satelah mendenger ini prenta, Goei Jan dan Klang Wie lantas bawa balatentaranja menoedjoe ka itoe kota.
Sebagimana Khong Beng poenja doegaän, bener djoega tempo iaorang sampe di San Koan moesoe jang mendjaga ini kota sigra melariken diri, hingga dengen begitoe itoe kota lantas dapet diambil.
Tida lama poela, sedeng Goei Jan dan Kiang Wie baroe maoe boeka pakean perang, tiba-tiba