Dengen djalan demikian, njatalah bener-bener kamoediân Goei Jan dapet boenoe moesoenja itoe.
Pada saäbisnja lakoeken ini pakerdjaän, dengen senang Goei Jan lantas berairgkat poelang ka Han Tiong sama-sama itoe tiga poeloe soldadoe koeda.
Tida selang brapa lama ia soeda sampe di itoe tempat, dimana ia lantas seraken balatentaranja pada Khong Beng.
Kamoedian ini ferdana mantri rajaken pesta besar di itoe tempat, tapi ini perkara tida perloe ditjeritaken.
Maskipoen di atas tiada ditjeritaken dari hal Thio Kap ada toeroet mengedjer moesoe, tapi toch blakangan ada ternjata, ini panglima ada toeroet ambil bagian di dalem itoe perkara. Tapi sebab doea hari di moeka moesoe soeda berangkat, maka tida oesa heran kaloe kamoedian Thio Kap kapaksa balik kombali ka pasanggrahannja Tjo Tjin dengen pertjoema.
Dan di sitoe baroelah Thio Kap dapettaoe dari hal meninggalnja Ong Song, sebab tempo ia sampe di itoe pasanggrahan, djoestroe soeroehannja Hok Tjiauw dateng wartaken itoe hal pada Tjo Tjin.
Brapa besar itoe kabar soeda datengken kadoekaän dalem hatinja Tjo Tjin, tjoekoeplah kaloe kita bilang, tida selang brapa lama sadari itoe warta sampe padanja, ini Touwtok lantas mendapat sakit, hingga kamoedian ia kapaksa berangkat poelang ka kota Lok Jang, pada sasoedanja titaken Kwee Hoaij, Soen Lee dan Thio Kap mendjaga bebrapa tempat jang perloe di kota Tiang An.