„Tapi menoeroet hamba poenja pikiran, itoe perkara ada pantes sekali," kata Sietiong Hoei Wie lang ada hadiir dalem itoe roewangan: „Hamba denger, orang jang memerenta negri haroes hargaken peratoeran sebagi perkara jang paling penting, kerna djikaloe atoeran tida dipegang betoel, begimanatah kita bisa toendoeken segala orang? Maka lagi sakali hamba bilang, djikaloe boeat itoe kasalahan Sinsiang soeda minta ditoeroenken pangkatnja, itoelah ada permintaan jang pantes sekali."
Houwtjoe lantas menoeroet. Sigra djoega ini Baginda soeda kaloearken satoe firman boeat toeroenken pangkatnja Khong Beng ka tingkatan JoeTjiangkoen, tapi itoe pakerdjaän jang wadjibnja moesti dilakoeken oleh Sinsiang, begitoe poen kakwasaän boeat oeroes sekalian balatentara, masi tetep diseraken padanja, serta prenta Hoei Wie bawa firman itoe ka Han Tiong.
Hoei Wie lantas berangkat dan lekas djoega ia soeda sampe pada tempat jang ditoedjoeken.
Tempo Khong Beng soeda samboet itoe firman begimana atoeran, Hoei Wie, jang kwatir ini ferdana mantri dapet maloe lantaran pangkatnja ditoeroenken, lantas mengoempak dengen berkata:
„Sinsiang taoe, pendoedoek di Sé Slok ada merasa giräng sekali, oleh kerna iaorâng taoe bermoela Sinsiang soeda dapet ambil ampat kota."
Ia kira dengen ini perkataän ia bisa senangken