mendatengin, ia lantas toeroen dari Icoedanja, laloe berloetoet di tana dan berkata seperti orang jang merasa bogéh: „Satoe panglima jang kala perang, soenggoe tida pantes sekali moesti disamboet oleh Sinsiang tjara begini."
Khong Beng lantas bangoenin Tio In itoe, dan sambil pegangin tangannja ini palima ia berkata dengen swara doeka: „Akoe mengakoe teroes terang pada Tjiangkoen, bahoea lantaran akoe tida kenal mana orang jang bidjaksana dan mana orang jang goblok, maka akoe poenja oeroesan soeda berachir begini roepa. Kerna, tidakah ada heran sekali, sedeng barisan-barisan jang akoe soeroe djaga di laen-laen tempat semoea telah dapet karoesakan, melaenken angkatan-perang jang dipimpin oleh Tjoe Liong sadja jang bisa poelang kombali dengen tida koerang satoe apa? Inilah sasoenggoenja heran, sasoenggoenja akoe tida mengarti!"
Teng Tji lantas tjeritaken, begimana tempo maoe berangkat, Tio In soeda soeroe ia, Teng Tji, djalan doeloean, sedeng Tio In sendiri mengikoetin dari blakang; dan begimana itoe panglima toea soeda boenoe moesoenja di sapandjang djalan, hingga moesoe itoe semoea djadi takoet mengedjer, dan inilah sebabnja, maka iaorang berdoea bisa sampe di Han Tiong dengen slamat, dengen tida kailangan apa-apa barang sapotong.