dititaken bawa soerat pembritaän ka kota Seng Touw.
Sampe di sini baeklah kita tjeritaken doeloe halnja Tjo Tjin, soepaja Pembatja mendapet taoe apa jang telah diberboeat oleh ini Touw-tok pada sasoedanja Khong Beng berlaloe dari goenoeng Kie San boeat toelak penjerangan dari fihak bangsa Kiang.
Sasoedanja ia kirim orang boeat minta toeloengannja bangsa Kiang, Tjo Tjin saban hari ada harep-harep kabar dari itoe fihak boeat dapet taoe, apa itoe bangsa soeka loeloesken ia poenja permintaän atawa tida. Tapi sedeng dari itoe fihak ia blon dapet balesan kabar apa-apa, adalah pada soeatoe hari ia poenja djoeroe kabar dateng membri taoe, bahoea soldadoe Siok telah bersiap boeat berangkat ka laen tempat.
„O," kata Kwee Hoaij dengen girang, tempo ia mendenger tjeritanja itoe djoero keabar:„moendoernja marika itoe, tentoelah djoega ada dari sebab di laen fihak iaorang dapet serangan dari bangsa Kiang."
Kerna Tjo Tjin djoega ada pikir begitoe, maka tida tempo lagi ia lantas prenta Tjo Tjoen dan Tjoe Tjan masing-masing mengapalaken satoe pasoekan boeat kedjer marika itoe.
Tempo marika ini madjoe mengedjer, itoe koetika soldadoe Siok soeda berangkat djaoe djoega.