Isen koeda, dan koetika ini binatang soeda sedia, sigra djoega ia membri slamat tinggal pada Tjhoei Liang, ialoe lompat ka blakang koeda dan lantas lariken ini toenggangan seperti terbang menoedjoe ka kota Thian Soei.
Siapa dioega jang meliat kelakoeannja Pwe Sie di itoe waktoe, tentoe tida sangkal Jang dia itoe sedeng oeroes pakerdjaän jang amat penting.
Blon berselang doea hari, komball ada dateng laen soeroehan, lang minta kota An Teng lekaslekas kirim bala bantoean, sebab ia kata, Thaijsioe di Thian Soei soeda geraken balatentaranja boeat menoeloeng kota Lam An.
Tjhoei Liang lantas berempoek dengen sekalian ponggawa jang bekerdja sama-sama di itoe kota, dan marika ini bilang. Itoe bala bantoean moesti dikirim, oleh kerna kaloe lantaran tida ditoeloeng, kota Lam An demikian poen He-Houw Hoema sampe dapet bintjana apa-apa, nistjaja itoe semoea kadosaän nanti ditoempaken atas kaälpaän ini doea kota.
Sebab begitoe, maka Tjhoei Liang lantas ambil poetoesan boeat toeloeng itoe kota jang sedeng dikepoeng moesoe.
Ia lantas siapken sadjoembla balatentara, dan bersama marika ini ia sigra berlaloe dari kota An Teng, jang di itoe waktoe djadi melaenken didjaga sadja oleh ponggawa-ponggawa jaag tida mengarti sama-sekali perkara perang.