„Och, toean!" kata Beng Hek itoe dengen mengela napas, sedeng aer-matanja lantas mengoetjoer: „toedjoe kali ditangkep, dan toedjoe kali dilepas lagi, itoelah satoe perkara jang dari doeloe kala blon perna terdjadi. Betoel akoe ini ada saorang jang idoep di loear kalangan sopan, tapi sebab sedikitnja akoe ada mengenal djoega adat-istiadat, maka masalah akoe nanti berlakoe sampe begitoe tida taoe maloe?"
Saabisnja cetjapken itoe perkataän, ia lantas adjak kaloewarganja dateng di kantoornja Khong Beng boeat minta maäf.
Dengen berloetoet atawa lebi betoel kaloe dibilang mendekem di goedri, iaorang berkata pada itoe perdana mantri:
„Di hadepan Sinsiang jang maha angker sekarang kita mengakoe, salama-lamanja kita, orang-orang di ini negri Salatan, tida nanti brontak lagi!"
„Apa dengen soenggoe sekarang kau hendak menaloek?" menanja Khong Beng.
— „Dengen ichlas hati, Sinsiang. Akoe poenja anak tjoetjoe semoea poen telah didoepin kembali oleh Sinsiang jang soeda oendjoek boedi besar, lantaran begitoe masalah masi sadja kita-orang brani tida menaloek?"
Kamoedian satoe pesta besar lantas diboeka dalem itoe roewangan, dimana Beng Hek dan koelawarganja itoe disilaken doedoek makan minoem dengen dapet banjak senang hati.