Lompat ke isi

Halaman:Boekoe tjerita Sam Kok (Jilid ke 49-55).pdf/130

Dari Wikisumber bahasa Indonesia, perpustakaan bebas
Halaman ini telah diuji baca
— 4062 —

Ia soeroe soldadoenja saboleh-boleh tjari djalan boeat lari kaloear, tapi sabelon iaorang bisa berboeat satoe apa, moesoe jang berdiam di atas kadoea goenoeng jang mengapit itoe djalanan, lantas lempar beratoes-ratoes obor ka itoe tempat, hingga soemboe jang dipasang salengkatan di dalem tana lantas menjala, dan lantas djoega menerbitken swara letoesan keras beroentoen-roentoen, membikin tana di itoe tempat djadi terbongkar.

Blon berselang satenga djam itoe antero lamping goenoeng soeda beroba djadi laoetan api. Sedeng itoe sekalian soldadoe Ban jang bikin dirinja djadi pengoempan, tida ada satoe jang tida djadi korbannja itoe bahaja.

Di sitoelah Goet Toet Koet dan tiga laksa balatentara Tin Ka Koen memboewang djiwa, pada sasoedanja saling peloek bergoeling-goeling dan melompat-lompat, tatkala pakeannja disamber api.

Khong Beng jang berdiam di atas boekit dan saksiken sendiri, begimana pengaroenja itoe api jang membakar itoe soldadoe, hingga marika ini kelodjotan dan menoebroek sana ka mari; begimana itoe obat pasang dan letoesan-letoesan jang dipendem di dalem tana soeda bekerdja melempar badannja sakeping-sakeping; dan begimana sangit baoenja marika itoe,—dengen tida dirasa lagi aer-matanja lantas mengoetjoer, dan berkata dengen mengela napas: „O, Allah! maski poen ini hari akoe soeda