„Tjoe-Kat Liang poenja tipoe sekarang kita soeda dapet tebak semoea; dalem tempo satenga boelan lamanja berentoen Taij-Ong telah dapet limablas kali kamenangan dengen dapet djoega doedoeken toedjoe pasanggrahan; maka tidalah heran kaloe moesoe kita sekarang melariken diri dengen toeroet haloean angin. Tjoe-Kat Liang jang terkenal ada mempoenjai banjak tipoe, sekarang poen soeda djadi kapoetoesan akal; maka kaloe sakali ini kita bisa madjoe teroes, nistjaja oeroesan kita jang besar itoe tentoe mendjadi beres.”
Goet Toet Koet poen djadi girang sekali kerna mendenger sobatnja itoe poenja bitjara, dan dari sebab begitoe, ia djadi tiada pikir lagi halnja moesoe.
Pada hari jang kaänemblas, Goei Jan madjoeken lagi barisannja jang soeda tida karoean matjem boeat bertempoer poela pada moesoe.
Goet Toet Koet keloear dari pasanggrahannja dengen menoenggang gadja, dan lantas hampirken marika itoe.
Ini hari baroelah Goei Jan meliat teges begimana dandanannja Goet Toet Koet jang roepanja bengis.
Itoe Radja ada pake topi jang tersaloet dengen koemis binatang dan badjoe perang jang ditaboer emas dan matjem-matjem moestika; tapi sebab itoe pakean tida menoetoep rapet pada ia poenja iga kiri dan kanan, maka Goei Jan djadi bisa dapet