Esoknja pagi, dengen doedoek kreta ketjil dan dianter oleh brapa orang, pendoedoek di itoe negri, Khong Beng pergi ka soeatoe tempat sepi, jang letaknja di sebla Oetara moeara Tho Hoa.
Khong Beng djalan terpoeter-poeter boeat preksa kaädaännja itoe tempat. Sigra djoega ia telah sampe di soeatoe djalanan jang amat soeker, hingga kretanja tida bisa liwat. Maka ia lantas toeroen dari itoe kandaran, laloe teroesken berdjalanannja dengen djalan kaki.
Sabentar lagi ia soeda naek di soeatoe goenoeng dan dari sitoe ia bisa meliat dengen njata pegimana kaädaän lampingnja itoe goenoeng jang bangoennja seperti oeler.
Di sitoe ada banjak wadas dan batoe-batoe besar jang beroendak-oendak dan dari sebab begitoe, djadi tida ada papoehoenan jang toemboe. Di sama tenganja ada satoe djalanan jang sampe lebar boeat Koensoe kita itoe atoer kaperloeannja.
Maka sambil menoendjoek ia menanja pada itoe penganter djalan: „Apa kau kenal namanja itoe lamping goenoeng?”
„Kenal,” menjaoet orang jang ditanja: „Poan Sia Kok, itoelah namanja. Di achirnja ini lamping ada djalanan besar jang mendjoeroes ka kota Sam Kang Shia, sedeng di moekanja ada kampoeng Tha Long Tian.”
„Bagoes! Kaloe begitoe, njatalah Allah ada berkoernia boeat akoe dapetken ini djasa.”