Orang boedjang ma'koewalon,
Pake badjoe tjahjanja boenglon,
Soeka dia djalan ngetan ka koelon,
Itoe dia namanja „balon.”
Orang boedjang lah koerang lakoe,
Harganja moerah lah pantek pakoe,
Diboedjoek lemes lah sampe kakoe,
Tida sekali lah dia mengakoe.
Orang boedjang matanja rèbèk,
Bangoen tidoer mengangon bèbèk,
Kondènja koesoet badjoenja robèk,
Awaknja montok tetapi lembèk.
Anak kepiting mandjepit kerang,
Pasang pelita di atas lankan,
Pasang koeping lah terang-terang,
Denger tjerita segala ikan.
Pasang pelita di atas lankan,
Bikin loempang si kajoe asem,
Dengar tjerita segala ikan,
Ikan tjoepang lah pada mèsem.
Bikin loempang si kajoe asem,
Beli seré di Pesebrangan,
Ikan tjoepang lah pada mèsem,
Ikan tjetjérè kagirangan.
Beli serdi Pesebrangan,
Koewé mangkok di dalem tenong,
Ikan tjetjéré kagirangan,
Ikan betok lah djadi bengong.
