44
Lipet setangan lah poetjoek paoe,
Gandaroesa aernja tjoeka,
Soepaja djangan lah orang taoe,
Resia berdoewa djadi terboeka.
Gandaroesa aernja tjoeka,
Ambil aloe di mangga doewa,
Resia berdoewa djadi terboeka,
Tanggoeng maloe kita berdoewa.
Ini soetra-soetra goeloengan,
Soetra poeti di latji katja,
Soerat ini soerat kiriman,
Kaloe soedi biarlah batja.
Soetra poeti di latji katja,
Segoeloeng lagi soetra belaoe,
Kaloe soedi biarlah batja,
Djangan kasi lain orang taoe.
Pegi ka Gondrong di waroeng obat,
Mampirnja lagi di Paroeng koeda,
Kaloe Nona maoe bersobat,
Mintaken tombong kalapa moeda.
45
Pegi ka Gondrong ka waroeng koeda,
Dari sitoe balik ka Angke,
Mintaken tombong kelapa moeda,
Mintaken lagi emping bertangke.
Dari sitoe balik ka Angke,
Ada linta di atas getek,
Mintaken lagi emping bertangke,
Minta tembaga dimakan seksek.
Ada linta di atas getek,
Pelita ada dalem tjoenia,
Minta tembaga dimakan seksek,
Tanda tjinta dalem doenia.
Tanem lobak lah satoe satoe,
Djangan ditanem dalem solokan.
Djiga bersobat biarlah tentoe,
Djangan denger moeloet gosokan.
Satoe doewa lah tiga ampat,
Ampat lima lah anem toedjoe,
Soeda di liat koeliling tempat,
Tjoema satoe nona penoedjoe.
