— 48 —
poenja diri, jang menanggoeng tanggoengan atas katentremannja ini tempat, dimana ia mendjadi pembesar ; salaennja itoe, kaloe ia meloeloesken ini permintahan, tentoe Tjeng Sian poen tida bisa menoelak iapoenja permintahian boeat toeloeng tjariken iapoenja tjap kabesaran. Sasoedanja ia berpikir pasti laloe ia mendjawab :
„Kaoe poenja permintahan biar poen ada sedikit gandjil, tapi akoe tida ada kaberatan boeat meloeloesken, apapoela djika dalem hal itoe sama sekali tida meroegiken padakoe. Tjoema akoe poen ada mempoenjai satoe permintahan pada kaoe," bitjara sampe disini ia tjendorongin badannja ka depan dan melandjoetken bitjaranja dengen soeara bisik-bisik : „Akoe poenja tjap kabesaran telah ilang pada maleman kapalanja The Lian-heng ditaro di atas akoe poenja medja pengadilan, sampe sekarang itoe tjap kabesaran masih belon bisa dikatemoeken dan djoega tida taoe siapa pentjoerinja ; tapi akoe doega keras tentoe ada perboeatannja Boe Beng Hiap Kek. Apa kaoe sanggoep toeioeng tjariken akoe poenja tjap kabesaran itoe ?"
„Ini perkara djoestroe ada mempoenjai perhoeboengan jang sanget rapet dengen apa jang sekarang pintjeng minta toaloya lakoeken," djawab Tjeng Sian, „sebab kaloe itoe pemboenoeh soeda bisa ditjari, dengen gampang sadja itoe tjap kabesaran bisa didapetken kombali, sebab pasti sekali pentjoerinja boekan laen dari Boe Beng Hiap Kek."
„Kaloe begitoe, baeklah moelai dari sekarang kita bekerdja sama-sama," kata itoe tikoan, „dan sabegitoe lekas itoe pemboenoeh bisa ditjari taoe siapa, kaoe boleh pergi menangkep dengen iriendapet bantoeannja akoe poenja pasoekan politie."
