Halaman:Boe Beng Hiap Kek.pdf/49

Dari Wikisumber bahasa Indonesia, perpustakaan bebas
Halaman ini tervalidasi

— 47 —

Toanyang, toaloya aken bikin satoe pesta di ini kantoor, dan boeat menjenangken hatinja orang-orang terpladjar, nanti aken disediaken sairan, kalimat peroendingan dan roepa-roepa badean, jang aken diminta boeat orang-orang jang dioendang toeroet bikin atawa poen menebak, barang siapa jang dianggep paling bagoes begitoe poen jang djato nummer doea sampe nummer sembilan, semoeanja aken dihadiaken prijs-prijs jang berharga.

„Boeat itoe semoea prijs nanti aken dikaloearken oewangnja oleh koelawarga The, tapi pintjeng ambil kabranian boeat minta toeroet preksa sasoeatoe toelisan jang ditrima, kerna pintjeng ingin akoerken sama toelisannja Boe Beng Hiap Kek. Djika kamoedian soeda ternjata siapa adanja itoe pemboenoeh, pintjeng berdjandji sanggoep menangkep padanja dan dipasrahken pada toaloya boeat dihoekoem dengen menoeroet oendang-oendang negri. Pintjeng berboeat begini, boekannja maoe minta oepahan, tapi meloeloe maoe toeloeng balesken sakit hatinja pintjeng poenja soedara angkat. Oleh kerna ini oeroesan ada berhoeboeng djoega sama toaloya poenja kewadjiban, maka pintjeng ambil kabranian boeat meminta toaloya jang menjediaken itoe sairan, kalimat peroendingan dan tjangkreman jang bakal dipake pada hari itoe: sedeng onkost-onkost boeat perdjamoeannja semoea aken ditanggoeng oleh koelawarga The. Belon taoe apa toaloya bisa meloeloesken pintjeng poenja permintahan itoe atawa tida ?”

Tikoan dari Ankhee pikir itoe oeroesan sama sekali tida ada kaberatan boeat ia meloeloesken; tapi itoe matjem perboeatan sasoenggoenja ada sanget gandjil dan lebih doeloe belon perna terdjadi. Tjoema blakangan ia balik pikir kaloe itoe pemboenoeh bisa tertangkep, toch ada mendjadi kabaekan boeat ia