Halaman:Boe Beng Hiap Kek.pdf/46

Dari Wikisumber bahasa Indonesia, perpustakaan bebas
Loncat ke navigasi Loncat ke pencarian
Halaman ini tervalidasi

— 44 —

taoe bahoea ia dateng dari roemahnja The Tay Hou jang diboenoeh mati oleh pendjahat jang memake kekoedoeng moeka item. Oleh kerna meliat romannja Tjeng Sian begitoe djahat, sedeng toeboenja ada begitoe tinggi besar, tida berbeda dengen satoe khay louw-sin, maka oppas pendjaga pintoe itoe kantoor tikoan tida brani berlakoe koerangadjar sebagimana biasanja terhadep pada rahajat jang kabanjakan, inanja boeroe-boeroe masoek mengasi taoe pada iapoenja madjikan.

Itoe tikoan dari Ankhee djadi sanget terkedjoet koetika mendenger Tjeng Sian Hweesliio minta bertemoe, sebab ia soeda taoe bahoea itoe kapaia goendoel ada sanget lihay, salaennja itoe ia ada mempoenjai banjak sekali saderek-saderek di kalangan lioklim. Dalem sedikit waktoe ia belon bisa tebak kadatengannja itoe kapala goendoel boeat kaperloean apa. Sebab, ia soeda bisa mendoega tentoe ada berhoeboeng dengen diboenoeh matinja The Tay Hou, tapi apa itoe hweeshio poenja maoe berhoeboeng sama itoe oeroesan, sasoenggoenja ia tida bisa bade sama sekali. Maka pada sabelonnja ia kasi prentah soepaja itoe hweeshio dikasi masoek, terlebih doeloe ia berpikir lama sekali, kerna ia tida taoe apa moesti trima atawa toelak koendjoengannja itoe kapaia goendoel. Tapi achir-achir ia ambil poetoesan boeat trima djoega, kerna ia pikir kaloe tida ditrima, nistjaja itoe kapaia goendoel perampok, aken bisa menjoesahi padanja. Sedeng itoe oeroesan tjap kabesarannja jang ilang poen, ia ingin minta tenaga bantoeannja itoe hweeshio boeat toeloeng tjariken. Sasoedanja berpikir tetep, lantes ia prentahken itoe oppas boleh kasi Tjeng Sian masoek.