— 41 —
Tjoema sekarang ternjata The Tay Hou tida bisa goenaken itoe senderan pada itoe ampat kiatpay, jang kabetoelan tida satoe di antaranja jang berada dalem roemahnja, hingga iapoenja kapala dipenggal oleh itoe Boe Beng Hiap Kek. Istrinja The Tay Hou jang taoe semoea resianja iapoenja soeami, sasoedanja iapoenja pengrasahan kaget dan sedih djadi moelai koerangan, lantes ia dapet inget pada Tjeng Sian Hweeshio di Tiang Kak Sie dalem district Tianglok, dan Hee Pat di Kioe-liong-kang, maka ia lantes soeroean doea orang kapertjajahannja pergi ka itoe doea tempat boeat mengasi taoe prihal kamatiannja iapoenja soeami, serta minta itoe doea kiatpay soepaja soeka lekas dateng ka Ankhee boeat menjelidikin siapa adanja itoe Boe Beng Hiap Kek dan bikin pembalesan pada orang itoe.
Oleh kerna Hee Pat poenja tempat tinggal di Tjiangpeng ada banjak lebih deket dari tianglok (kerna Hee Pat membadjak di sapandjang soengei Kioe-liong, tapi iapoenja tempat tinggal jang tetep di bilangan district Tjiangpeng), maka ia jang lebih doeloe sampe ka Thay-swee-tjhung. Sesampenja ia lantes menangis dengen sedih sekali di depan peti matinja iapoenja djiko, sebab di antara marika berlima, Tjeng Sian Hweeshio jang mendjadi toako, The Tay Hou kadoea, Tjio-bin-houw Gan Tjay, Giok katiga, Hee Pat sendiri kaimpat, dan jang paling moeda Tjhio Goan Beng.
Bebrapa hari kamoedian, baroelah Tjeng Sian Hweeshio dateng bersama Tjhio Goan Beng jang kabetoelan lagi menenamoe di Tiang Kak Sie. Iaorang poen lantes sembahjang di depan peti matinja The Tay Hou dengen sedih “sekali, malah Tjeng Sian Hwee shio bersoempa jang ia aken bales itoe djitee poenja sakit hati, sebab biar bagimana djoega, itoe pemboenoeh ia maoe tjari sampe dapet.
