— 108 —
rakan jang sanget tjepet dan tida terdoega, bermoela ia mendjotos sama tangan kirinja ka djoeroesan poesernja iapoenja lawanan, kamoedian disoesoel sama tangan kanannja jang menoesoek sama doewa djeridjinja ka djoeroesan matanja Boe Beng Hiap Kek, dan achirnja disoesoel iagi sama iapoenja satoe tendangan jang ditoedjoeken pada iapoenja lawanan poenja anggota resia.
Itoe serangan jang begitoe gentjer dan heibat bisa dioepamaken angin poejoeh jang lagi mengadoek, kaloe sadja orang jang diserang boekannja Boe Beng Hiap Kek, sekali poen bisa mengegos jang pertama dan kadoea, tapi achirnja aken kena katendang djoega sama kakinja Tie Tjong Siansoe, jang ditendangken sembari berlompat; tapi Boe Beng Hiap Kek kenal itoe matjem tipoe, tatkala tangan kirinja iapoenja lawanan jang mendjotos poesernja sampe, dengen sengadja ia tangkis sama tangan kanannja sembari mengaloearken iapoenja khikang jang santer, hingga lawanannja poenja tangan djadi melengket pada ia poenja tangan, dan koetika tangan kanannja iapoenja lawanan jang menoesoek ka djoeroesan matanja sampe, kombali ia toelak dengen tipoe Thian-ong-tok-ta sama iapoenja tangan kiri, dan sebagitoe lekas kakinja Tie Tjong Siansoe jang menendang ditoedjoeken pada iapoenja anggota resia, dengen tjepet ia tarik moendoer kaki kirinja ka blakang, dan bikin iapoenja badan djadi menjamping, hingga tendangannja iapoenja lawanan djadi loepoet dan tida bisa dapetken maksoednja.
Oleh kerna kadoea tangannja Tie Tjong Siansoe djadi terpentang, sedeng itoe tendangan Tie Tjong Siansoe ada tjoe-bo-wan-yio-toei, jang bakal disoesoel oleh kakinja, jang sabelah lagi, Boe Beng Hiap Kek
