Halaman:Boe Beng Hiap Kek.pdf/104

Dari Wikisumber bahasa Indonesia, perpustakaan bebas
Halaman ini tervalidasi

— 100 —

hweeshio ada sanget berat dan ilmoe silatnja poen bagoes sekali tapi biar poen begitoe istrinja tida gampang-gampang maoe kasiken dirinja didesek, dan iapoenja sapasang pedang dipoeter seperti titiran tjepetnja boeat melindoengin iapoenja sakoedjoer badan, hingga tjoema keliatan sapasang sinar poetih,jang menoetoepin iapoenja badan, oleh kerna itoe djoega, itoe hweeshio toewa poenja toengket tida bisa mengenaken badannja.

„Djangan kwatir, istrikoe, sekarang djoega akoe dateng membantoe!” berseroeh Boe Beng Hiap Kek. „Tetepken kaoe poenja hati dan bersilat teroes dengen baek.”

Sahabisnja berkata begitoe ia melajang toeroen ka itoe lataran, menjerang pada Tie Tjong Siansoe, kerna itoe hweeshio toewa boekan laen dari soesioknja Tjeng Sian Hweeshio, jang djadi sanget terkedjoet koetika meliat Boe Beng Hiap Kek bersilat dalem ilmoe pe­dang Ngo-tjouw-kiam, sebab itoelah ada samatjem ilmoe pedang jang sanget tinggi, dan djarang sekali ada orang jang bisa pahamken. Tie Tjong Siansoe sendiri sekali poen ada mengarti sedikit tentang selak-seloeknja Ngo-tjouw-kiam, tapi lantaran ia belon pa­hamken sampe tamat, maka banjak bagiannja jang kikiauw ia tida begitoe mengarti. Boeat melindoengin dirinja laloe ia kaloearken iapoenja ilmoe toengket jang dinamaken Ban-hoa-sian-tiang, jaitoe ilmoe toeng­ ket jang paling tinggi.

Lantaran koerang hati-hati, istrinja Boe Beng Hiap Kek poenja salah satoe pedang kena kasampok oleh toengket besinja Tie Tjong Siansoe jang berat, hingga djadi terlepas dari iapoenja genggeman.

„Istrikoe! kaoe boleh moendoer sadja.” berseroeh Boe Beng Hiap Kek, „biarken sadja akoe sendiri jang tandingin padanja.”