— 99 —
perlahan, serta angkat iapoenja badan dengen didjambak ramboetnja sampe tiga kali. Dengen perlahan ia bisa bisa bergerak lagi sabagimana biasa, tapi oleh kerna katek dan poendaknja masi teriket, ia pikir tida goenanja boeat merat, sebab taro ia bisa djoega, tida oeroeng bakal katangkep lagi.
VIII.
Binasanja Tie Tjong Siansoe.
Boe Beng Hiap Kek berlompat naek lagi ka atas tembok kota, dari mana ia goenaken ilmoe kiamtoen balik poelang ka roemah sekola. Sesampenja dengen indap indap ia memboeka djendela, itoe waktóe kadengeran tongtong dipoekoel sabelas kali, dan iapoenja moerid djoestroe menggeros dengen enak; tapi koetika ia boekaken klamboe pembaringannja, ia menampak satoe soerat dari istrinja jang berboenji; „Akoe tida taoe kaoe pergi ka mana; tapi akoe maoe soesoel kaoe ka roemahnja koelawarga The di Tjay-swee-tjhung.”
„Dari kaoe poenja Kie.”
Boe Beng Hiap Kek djadi sanget terkedjoet koetika abis membatja itoe soerat, boeroe-boeroe ia masoekin ka dalem sakoenja, boeka djendela kamar berlompat kaloear dan rapetken lagi djendela itoe. Dengen goenaken lagi iapoenja ilmoe kiamtoen ia melajang kaka djoeroesan Tjay-swee-tjhung. Baroe sadja ia mengindjek woewoengan roemahnja koelawarga The, dengen lantes ia denger soeara orang lagi bertaroeng, di satoe lataran itoe roemah jang sabelah barat. Ia memboeroe ka sitoe, ternjata istrinja lagi bertaroeng sama satoe hweeshio toewa, dan kaliatannja iapoenja istri soeda moelai kateter, kerna toengket besinja itoe
