„Di mana ia soeda mengomong sama kan?”
„Satoe fatsal jang akoe sendiri sedeng pikirin. Gampang sekali ia djadiken akoe dia poenja advocaat... Apa tiada ada daja... Apa betoel tiada bisa diperbaekin?”
Dollij brenti sabentaran dan kamoedian landjoetkan lebi djaoe omongannja:
„Apa betoel keada'anmoe tiada bisa dibikin proba'an? Kau sendiri taoe apa jang akoe hendak maksoedken? Enfin, dengen pendek akoe maoe bilang, bae'an kau kawin sadja...”
„Dengen laen perkata'an kau maoe soepaja akoe bertjere?” tanja Anna. „Tapi apatah jang Alexis bilang padamoe?”
„Ja, kau moesti mengarti jang ia merasa sedi lantaran inget kau dan dirinja sendiri. Djoega bagimana nanti djadinja dengen itoe anak dan itoe anak-anak jang bakal dilahirken?”
„Anak-anak jang mana?” tanja Anna dengen mata jang mengawasin dengen tiada soedanja.
„Annie dan iapoenja soedara-soedara jang bakal dilahirkan?”
„Gila betoel, kau ini. Apa kau kira akoe ini kapengen poenja anak lagi? Akoe boekan ada itoe orang jang terlaloe iboekin dengen kasengsara'an diri sendiri. Tjoba kau pikir, kapan sampe akoe bisa lahirken itoe anak-anak, apa djadinja dengen marika itoe? Nama siapa ia orang moesti pake? Djoega kalahirannja sadja soeda bisa bikin djadi maloe, lantaran inget perboetannja iapoenja bapa, iboe dan dirinja sendiri...”
„Djoestroe begitoe, perloe sekali kau bertjere...”
„Omong si enak, apa kau pikir Karenine maoe bertjere. Sekarang ia ada di bawa pengaroenja gravin Lijdie...
Dollij doedoek dengen hadepin Anna, dengen ati jang sedi kapan inget nasibnja si ipar jang begitoe tjilaka.
„Kau toch boleh tjoba?”
„Tjoba, itoe ada satoe hal jang bisa bikin atinja djadi tiada senang, tapi kapan akoe mengakoe sala, itoelah tandanja akoe menghinaken diri sendiri... Baeklah, oepamaken akoe tjoba lakoeken itoe... Tentoe bakal berachir dengen satoe penoelakan jang menghina atawa ia membri idjin? Djikaloe sampe ia maoe bertjere, bagimana djadinja dengen akoe poenja Serioja? Tentoelah ia tiada maoe seraken itoe anak sama akoe. Ia bakal teroes tinggal sama bapanja... Ia tentoe bakal hinaken akoe poenja diri... Kau haroes taoe jang dalem ini doenia ada doea orang jang akoe tjinta, ialah Serioja dan Alexis; zonder marika itoe akoe tiada maoe idoep di ini doenia. Jang laen akoe ta begitoe iboekin. Kau djangan tjoba kasi nasehat pada akoe, kerna kau blon ..madjoe” djaoe...”
Abis bilang begitoe ia deketin Dollij sembari berkata:
„Bagimana kau pikir tentang akoe? Djangan kau hinaken akoe poenja diri, kerna akoe boekan itoe orang jang pantes dapet hina’an. Akoe ini sabetoelnja ada satoe orang jang tjilaka. Apa di ini doenia ada prempoean jang begitoe tjilaka seperti akoe?”
Abis bilang begitoe ia menengok ka laen djoe—
