tiada senang meliat Anna toenggang koeda, tapi tempo soeda bertemoe satoe sama laen itoe rasa tiada senang lantes ilang; begitoe lekas matanja Anna dapet meliat Dolly, ia lantes kaboerin koedanja dan tempo soeda berdeketan ia lantes peloek Dolly dengen lakoe jang tjinta sekali
Jang Anna merasa girang soeda bisa ketemoe Dolly, itoelah tiada perloe ditoetoerken lagi dan tempo Vronskij soeda dateng di sitoe, poen Anna soeda njataken iapoenja kegirangan, sedeng Vronskij sembari boeka topinja membri hormat pada Dollij.
Tempo Dollij tanjaken ka'ada'annja Anna, ia ini dengen goembira bilang, jang sekarang ia idoep dalem kasenangan dan kabroentoengan.
Dollij menjataken girangnja, tapi menanja, kekenapa Anna tiada maoe toelis soerat padanja.
„Itoelah akoe tiada maoe berboeat, sebab kau taoe sendiri bagimana ka'ada'ankoe ini...”
„Oh, itoe bagi akoe sama sadja. Akoe tjinta kau dan sampe sekarang poen begitoe.”
Mendenger begitoe Anna djadi sedi... Dengen bergandengan itoe doea sobat balik kombali ka tanahnja Vronskij dan achirnja menoedjoe ka kamernja Anna jang diriasin dengen bagoes sekali.
Diam-diam Dollij benerken dan poedji perboeatannja Anna. Seperti prempoean jang biasa idoep saderhana, jang sekarang soeda tiada begitoe disoeka lagi, boekan sadja Dollij ma'afken Anna bikin itoe perhoeboengan resia, hanja ia sendiri poen maoe rasaken. Laen dari pada itoe atinja ada tjinta pada Anna. Menoeroet pantes toch Dollij moesti berpihak pada Karenine jang pengidoepannja dibikin roesak. Dollij tiada begitoe soeka sama Vronskij, kerna ia pandang ini lelaki terlaloe sombong dan tiada taoe apa jang sabetoelnja Vronskij boeat sombong salaennja iapoenja kakaja’an. Seringkali Dollij dapet anggepan jang tiada enak kapan djalan bersama-sama Vronskij. Begitoelah tempo kaesokan paginja ia djalan bersama-sama Dollij dapet liat moekanja Vronskij seperti orang jang maoe mengomong apa-apa. Kanjata’an doega’annja tiada kliroe; begitoe lekas Vronskij dapet kanjata’an jang Anna tiada liat dirinja, maka dengen lakoe terboeroe-boeroe ia bilang:
„Akoe taoe kau djadi sobat kentel dari Anna, akoe taoe djoega jang kau ada poenja pengaroe besar atas dirinja, maka itoe, akoe tanja apa kau soeka toeloeng akoe?”
Dollij pandang moekanja Vronskij dengen tiada soedanja, sembari menanja sama dirinja sendiri, pertoeloengan apa jang Vronskij hendak minta.
„Lantaran kau ada sobat jang satoe-satoenja jang dateng di sini, maka akoe soeda braniken ati boeat minte itoe pertoeloengan...”
„Apa perloe akoe mengasi itoe pertoeloengan?”
Dengen poetoesin omongannja Dollij, Vronsijk bilang lebi djaoe begini:
„Biarlah idjinin akoe bitjara teroes. Denge teroes terang akoe bilang, tra saorang jang taoe baek bagimana ka’ada’annja Anna seperti akoe sendiri taoe...”
