tjela Anna penja perboeatna... Iapoenja perkata'an jang "mengakoe tjinta Anna dengen sagenep djiwanja," ada hal jan bertentangan sekali sama atinja, hingga dirinja merasa maloe lantaran bisa berdjoesta begitoe.
Sedeng begitoe adalah Anna pertjaja abis dengen Vronsky poenja pengakoean.
Dengen ka'ada'an seperti biasa keesokan paginja Vronsky dan Anna pergi ka tana-tananja familie Vronsky.
Dolly menginep boeat brapa hari lamanja sama Kitty jang sekarang soeda kawin sama Levine. Itoe waktoe Dolly maoe goenaken boeat ketemoein Anna. Ia merasa menjesel sekali djikaloe Kitty dan Levine merasa tiada senang dengen iapoenja maksoed, tapi adalah iapoenja kwadjiban aken tjari Anna, teroetama aken oendjoekin jang dirinja tiada beroba, mestipoen sekarang Anna soeda ikoet Vronsky. Di harian brangkat Levine ada sediaken satoe kreta dengen ampat koeda dan satoe koeda reserve aken Dolly pake mengoendjoengin Anna, jang tinggal tiada brapa djaoe lagi.
Di roema, selaloe iboek dengen mengoeroes iapoenja anak-anak, ia tiada ada tempo aken pikirin nasibnja Anna; di ini perdjalanan ia ada poenja tjoekoep tempo aken timbang dirinja Anna, sebab iapoenja anak-anak ia soeda tinggalin dengen didjaga sama satoe goeroe prempoean dan iapoenja soedara jalah Kitty.
Pertama ia bandingin dirinja sama Anna, jang ia tiada brani tetepken apa dirinja ada lebi baek dari Anna. Akoe betoel ada poenja satoe soeami jang akoe tjinta, kendatipoen boekan akoe poenja kamaoean sendiri, tapi toch akoe tjinta dirinja, tapi Anna blon perna poenja soeami jang ia tjinta. Boleh djadi kaloe dirikoe seperti Anna, akoe poen berlakoe begitoe dan sampe sekarang ia masi blon taoe apa ia soeda berlakoe betoel, dengen toeroet nasehatnja Anna, tempo ia ini dateng di Moskou. Pantesnja akoe moesti tinggalin akoe poenja soeami dan toentoet satoe pengidoepan baroe; apa ka'ada'ankoe sekarang ada lebi baek? Sekarang akoe soeda tiada endaken lagi akoe poenja soeami, betoelnja tempo itoe akoe boleh tinggalin dirinja, sebab paraskoe itoe waktoe masi sampe tjakep... Anna soeda berlakoe betoel dan sebab begitoe baeklah akoe tiada kata-katain dirinja.
Anna sekarang sedeng idoep dalem kabroentoengan dan ia bajangin ka'ada'annja Anna jang sedeng ada dalem kabroentoengan.
Sembari pikirin ini hal plahan-plahan kretanja soeda sampe di tempatnja Vronsky. Dari djaoe ia liat tiga toean dan satoe njonja jang toenggang koeda dan satoe kreta ikoetin dari blakang. Kanjata'an marika itoe boekan laen dari Vronsky bersama iapoenja boedjang, lebi djaoe Veslovski dan Anna, sedeng di dalem kreta ada doedoek prinses Varvara dan Svinjski. Pertama Dolly merasa
