Mengambek lantaran satoe hari dirinja tiada ditengokin, Anna tanjaken apoenja djoeroerawat, kemana Vronsky soeda pergi dan silaken panggil itoe toean boeat lantes dateng dalem iapoenja kamer.
Brapa minoet soeda berlaloe dan tempo itoe djoeroerawat dateng kombali, ia ini kabarken jang toean sedeng dapet tetamoe dan kaloe Anna maoe, ia boleh sigra dateng bersama-sama itoe tetamoe.
Mendenger itoe djawaban Anna djadi sanget mendongkol kerna dengen adanja itoe tetamoe ia djadi tiada bisa lampiasken iapoenja nafsoe amara.
Plahan-plahan pikirannja Anna djadi tjoeriga sama dirinja Vronsky, jang ia anggep soeda tiada tjinta lagi dirinja. Dengen inget sama hal-hal jang terdjadi blakangan ia tjoba tace perhoeboengan dirinja sama Vronsky jang ia anggep semingkin lama djadi semingkin renggang. Paling tjilaka sekarang Anna sangka Vronsky ada poenia laen katjinta'an.
„Paling baek ia bitjara dengen teroes terang pada akoe, kerna dengen adanja itoe akoe djadi tace bagimana akoe moesti berlakoe terhadep pada dirinja.”
Vronsky dateng dan denger jang Anna pagi-pagi kaloear. Ia heran jang Anna pergi dengen tiada maoe tjeritaken apa-apa padanja, lagian sikepnja jang aneh bikin Vronsky djadi merasa tiada enak. Ia ambil poetoesan aken toenggoe Anna dateng di salon dan di sitoe ia maoe minta katrangan kamana Anna soeda pergi.
Anna dateng di sitoe bersama-sama tantenja Vronsky. Roepanja ia tiada liat parasnja Vronsky jang ingin dapet ketrangan apa-apa dari dirinja.
Medja makan soeda teratoer dan prinses Touchkevitch poen toeroet doedoek. Tiada lama lagi dateng orang soeroeannja prinses Betsy jang mengabarken ia tiada bisa dateng di itoe pesta, tapi minta poekoel satenga 7 dan 8 dateng di roemanja.
„Sajang sekali jang di itoe waktoe akoe ada poenja laen keperloean," kata Anna.
Prinses Touchkevitch tanja apa Anna maoe nonton Opera. Tentoe, djawab Anna, kapan akoe bisa dapet loge.
Aken itoe prinses Touchkevitch nanti oeroes dan Vronsky jang denger itoe djadi moering-moering.
Tempo Anna soeda ada sendirian, Vronsky tanja apa betoel Anna maoe pergi nonton Opera.
„Ja," kata Anna, „kenapa kau tanja?"
„Kenapa akoe tanja, wel sebab itoe ada kaperloeannja. Kau toch mengarti jang kau tiada boleh nonton Opera..."
„Kenapa tiada!? Akoe tiada perloe sama laen orang. Akoe tjinta kau dan laen orang boleh persetan! Asal sadja kau poenja katjinta'an tiada beroba..."
„Akoe tinggal tetep tjinta pada kau, tapi akoe"
Anna Karenine.
