jang Anna setoedjoe? Ia tentoe tiada maoe apa-apa, ia tentoe tiada brani minta apa-apa. hanja ia bakal tinggalkan ini roema kerna maloe sama kabaekannja Karenine.
„O, Allah! O, Allah! kenapa?” demikianlah Karenine mengeloe saorang diri, lantaran pikirannja inget jang kapan sampe djadi dibikin itoe pertjere'an, segala kasalahan bakal djato di atas poendaknja si soeami. Saking maloe ia toetoepin moekanja dengen iapoenja kadoea tangan, ja sama djoega seperti Vronsky doeloean berboeat tempo menjamperin tempat pembaringannja Anna.
„Ja, ja!” begitoelah achirnja ia bilang pada Oblonsky. „Segala kadjelekan akoe soeka trima. Malahan akoe maoe seraken djoega akoe poenja anak padanja, akan tetapi apatah tiada lebi baek kaloe Serioja tinggal tetep sama akoe? Berboeatlah apa jang kau anggep baek!”
Dibraniken dengen sikepnja Karenine, Oblonsky, sasoedanja Karenine berdiam sakoetika lamanja, bilang: „Pertjajalah akoe, Anna tentoe endaken kau poenja kabaekan.”
Aer mata jang toeroen seperti oedjan bikin Karenine djadi tiada bisa berkata-kata.
„Ini ada satoe katjilaka'an jang semoea orang wadjib toendoek,” kata Oblonsky. Akoe anggep ini katjilaka'an sebagi hal jang terpaksa dan 'koe bakal kaloearken tenagakoe aken kabaekannja kau dan Anna poenja diri.”
Dengen paras jang lesoe ia berlaloe dari kamernja iapoenja ipar, tapi maskipoen begitoe toch atinja merasa girang lantaran soeda bisa beresken ini hal jang roewet. Ia taoe pasti jang Karenine bakal tiada tarik kombali iapoenja perkata'an.
Tiada lama lagi Vronsky soeda semboe dari loekanja. Lantaran itoe „poekoelan” jang membahajaken djiwanja, Vronsky anggep kamaloean dan hina'an atas dirinja soeda ditjoetji. Sekarang ia boleh pikir kombali tentang dirinja Karenine, jang diam-diam ia alem sebagi orang jang berpikiran moelia zonder merasa dirinja terhina dan laen-laen poela. Kombali ia toentoet pengidoepannja saperti biasa zonder kikoek dan omong dan berkaoel dengen senang dengen iapoenja sobat-sobat. Tapi maski bagimana djoega ia hiboerin atinja toch katjinta'annja pada Anna tetep mengambil tempat dalem atinja. Betoel pikirannja soeda tetep tiada maoe ganggoe poela Anna, begitoe djoega Karenine, aken tetapi iapoenja katjinta'an pada Anna ada satoe hal jang ia tiada koeat lawan. Itoe waktoe jang ia rasaken dengen idoep bersama-sama Anna tinggal teroes dalem iapoenja pikiran, malahan sekarang ia rasaken dan jang doeloean.
Dengen pertoeloengannja iapoenja sala satoe sobat, ia soeda dapet kadoedoekan jang tinggi di Tartarije. Dengen tiada sangsi lagi Vronsky trima baek itoe ka'angkatan. Semingkin deket waktoenja aken ia brangkat, semingkin kras atinja inget sama Anna, hingga itoe kwadjiban jang diseraken padanja, tiada ia maoe perdoeliken. Sabelonnja akoe mendem di sana baeklah akoe liat satoe kali lagi dirinja Anna, begitoe djoega
