„Tapi itoe anak ada sakit," kata Karenine tempo ia denger itoe anak mendjerit-djerit. Sakean lamanja ia berpikir dan kamoedian masoek di kamer aken meliat ka'ada'annja itoe anak.
Itoe anak ada di'mpo oleh satoe baboe dan tiada maoe isep soesoe.
„Apa ka'ada'annja tiada bae'an ?" tanja Karenine.
„Roepanja itoe anak ada sakit brat," djawab itoe baboe mongmong dengen soeara pelahan.
Dengen tiada bilang apa-apa Karenine pandang itoe anak sakoetika lamanja, tapi dengen sakoenjoeng-koenjoeng ia bersenjoem dan berlaloe dari itoe kamer dengen tiada kaloearken satoe pata perkata'an lagi.
Tempo ia ada di kamer makan, kombali ia soeroe boedjangnja panggil dokter. Ia mara sekali pada Anna lantaran tiada maoe oeroes lagi itoe anak. Dalem ka'ada'an begitoe ia tiada maoe pergi di kamernja Anna, tapi djoega boekan lantaran ia doega prinses Betsy, jang kretanja ia perna liat di depan pintoe, ada di dalem kamernja Anna. Dengen sakoenjoeng-koenjoeng atinja merasa koeatir jang Anna nanti merasa tiada senang lantaran ia bertentangan seperti biasandja tiada dateng di kamernja aken membri hormat. Tapi sasoedahnja pikir boelak-balik sakoetika lamanja ia tetepken atinja aken dateng di kamernja Anna. Tempo ia sampe di pintoe ia niat aken lawan kahendaknja aken mengomong apa-apa sama Anna.
„Akoe tiada mengarti kenapa bolehnja kau mencelak. Tiadakah ia maoe pergi dari ini tempat," kata Betsy.
„Itoe ada akoe poenja kahendakan dan boekan ada kamaoeannja akoe poenja soesami. Lebi baek sekarang kau djangan bitjaraken lagi tentang ini," djawab Anna dengen soeara ketoes.
„Tentoe sadja, tapi toh ada satoe moestail sekali jang kau tiada maoe ketemoe lagi padanja aken membri slamat tinggal pada satoe lelaki, jang lantaran kau poenja diri ampir sadja soeda abisken djiwanja dengen djalen jang amat ngeri."
Karenine tinggal berdiri diam, kaget dan penoe dengen rasa maloe. Ia tadinja maoe berlaloe dari itoe tempat, tapi anggep itoe ada amat renda. Sengadja ia berdehem dengen koeat, boeka pintoenja kamer dan dateng ke dalem kamer, sedeng Betsy dan Anna tinggal diam sadja.
Anna ada doedoek di satoe korsi males dengen pake badjoe jang berwarna aboe-aboe, sedeng ramboetnja jang digoenting pendek ada disisir dengen rapi. Begitoe lekas matanja dapet liat Anna, begitoe tjepet djoega sinarnja jang gilang-goemilang lantas ilang. Ia toendoekin kepalanja dan pandang Betsy dengen roepa jang penoe kakoeatiran.
Prinses Tverskaia membri hormat pada Karenine dengen senjoem jang manis dan bilang dengen soeara keras:
„Girang sekali atikoe lantaran bisa bertemoe dengen kau, 'koe kira kau tiada dateng kemari. Sedari Anna sakit akoe tiada perna liat kau. Tapi
