Anna jang menoendjoekin ia tiada sekali tjinta pada soeaminja.
„Semoea soeda kasep. Anna jang betoel tiada tjinta soeaminja toch tjoba loepaken perhoeboengan jang ia bikin sama akoe Dan akoe, akoe tiada bisa idoep zonder dia! Bagimana itoe perhoeboengan bisa disamboeng lagi?" ... Ini ia oetjapken dengen soeara jang sedikit kras dan oelangin itoe sampe berkali-kali, dengen maksoed soepaja iapoenja pikiran tiada inget laen-laen hal.
Ia tinggal teroes reba di divan, tjoba bikin dirinja poeles, kendati ia sendiri taoe jang niatnja tinggal sia-sia. Dengen kabetoelan ia oelangin dengen plahan apa jang atinja ada inget, dengen harep pikirannja tiada djadi begitoe kaloet. Lapat-lapat ia denger soeara jang bilang:
„Kau tiada bisa hargaken Anna sebagimana moestinja. Kau tiada bisa senangin atinja dengen tjoekoep!"
„Apa akoe soeda gila?" tanja ia dengen seorang diri. „Bisa djadi begitoe. Apa itoe tiada dengen alesan?... Apa dalem perkara begitoe orang tiada abisken djiwanja dengen kirim satoe pelor, di iapoenja kepala. Boeät akoe semoea soeda kasep. Akoe moesti pikir baek-baek, apa jang masi katinggalan boeät akoe poenja diri."
Sekarang ia inget pengidoepannja dengen zonder Anna. Sobat-sobatnja dan doenia, kanjata'an tiada bisa toeloeng dirinja. Perhoeboengannja sama nona Kitty soeda lama dipoetoesken. Lagian ini tiada sekali ia pikirken.
Kamoedian ia bangoen, boeka iapoenja badjoe djas, kamoedian ia djalan moendar-mandir.
„Dalem perkara seperti akoe tiada ada laen djalan dari pada kirim satoe pelor di kepala," begitoelah ia oelangin niatannja dan samboeng lebi djaoe omongannja dengen soeara plahan: „aken tiada idoep di doenia dengen rasa maloe!"
Ia samperin pintoe, toetoep itoe, kamoedian dengen gigit bibirnja ia menoedjoe ka medja, di mana ia ambil iapoenja revolver, preksa itoe dan achirnja lobangnja ditoedjoeken pada dirinja. Tatkala itoe pikirannja ada kerdja kras. Achirnja ia teedjoeken itoe sendjata api di dada kirinja dan kamoedian tarik pelatoesknja. Tempo soearanja itoe sendjata meledak ia tiada denger, tapi satoe poekoelan kras jang memoekoel dadanja bikin ia djadi sempojongan. Ia niat boeat pegang pinggirannja medja, djatoin itoe revolver, sedeng ia sendiri poen toeroet djato di oebin dan dengen roepa heran meliat di sapoeter dirinja. Tiada sekali ia kenalin kamernja sendiri. Tindakanjang kras dan tjepet dari iapoenja boedjang-boedjang kombali ganggoe iapoenja pikiran. Ia taoe jang dirinja sekarang sedeng reba di oebin dan ia tjoba boenoe kombali dirinja, sebab ia liat ada dara di tangannja. „Gagal akoe poenja niatan!" begitoelah ia bilang dan tangannja tjari itoe revolver. Itoe sendjata api ada menggletak di deketnja, tapi ia tjari di satoe tempat jang sedikit djaoe; satoe djam kamoedian ipar prempoeannja, Vronsky dateng di sitoe sembari bawa tiga dokter, jang
