Dengen sakoenjoeng-koenjoeng atinja djadi djato kesian sama dirinja Anna. Jang sekarang mengadoek dalem pikirannja adalah katjinta'an dan pembrian ampoen.
Ia berdjongkok di depan tempat tidoer, taro kepalanja di deket ketiaknja Anna jang amat panas dan menangis seperti satoe anak ketjil.
Kepalanja Karenine Anna oesap-oesap, sembari geser badannja aken dateng lebi deket pada Karenine dan matanja meliat ka plafond dengen bernafsoe...
„Dia soeda dateng, 'koe taoe jang dia bakal dateng, dan sekarang, slamat tinggal pada semoeanja... Ah, kombali ia ini ada di sana... Dokter, lepasken akoe dari itoe selimoet..."
Dokter kombali pegang tangannja Anna dan kamoedian tindihin itoe sama bantal... Anna tinggal tetep reba dengen mengatjo, samentara itoe matanja meliat ka kanan dan ka kiri...
„Ingetlah, jang 'koe perloe sama sekali dengen kau poenja pembrian ampoen!... Itoe ada satoe-satoenja jang akoe kahendakin... Aken tetapi, heran kenapa kau tiada maoe masoek?..."
Ia liat ka kamer pakean, di mana ada doedoek Vronsky. „Masoek, masoek!... Kasi tanganmoe padanja..."
Vronsky samperin pinggirannja tempat tidoer. Kombali ia toetoepin moekanja dengen iapoenja tangan.
„Angkat kau poenja tangan, liat dianja, di ada satoe orang jang soetji...", kata Anna;
„angkat toch kau poenja tangan," begitoelah ia bilang lebi djaoe dengen roepa goesar. „Alexis Alexandrovitch, angkat iapoenja tangan, akoe maoe liat dia . . ."
Bahna doeka dan maloe Karenine angkat tangannja Vronsky . . .
„Kasi tangan padanja, ampoenin dirinja . . .
Karenine sodorken iapoenja tangan, zonder bisa tahan djatonja iapoenja aer mata dari iapoenja kadoea mata . . .
„Allah jang maha Koeasa, sekarang akoe soeda bersedia, akoe soeda klaar . . . Sekarang akoe maoe lonjdorken akoe poenja kadoea kaki, begitoe ja begitoe ada baek . . . Bagoes betoel itoe gambar kembang jang diteeken dengen tjara jang begitoe pande . . .", kata Anna dan dengen djarinja ia oendjoek itoe gambar. Allah jang maha Besar, kapantah abis . . . Kasi akoe morphine, dokter, kasi akoe morphine. Ah, Toehan jang maha Koeasa . . ."
Anna teroes merinti di tempat tidoer. Iapoenja dokter, dan dokter-dokter jang di panggil boeat consult, njataken jang Anna dapet kraamvrouwenkoorts, satoe penjakit jang dalem 100 belon tentoe satoe jang idoep.
Anna pingsan di antero hari. Sampe djaoe malem ia teroes tiada inget orang sementara iapoenja meh tempo dipegang tinggal tiada berdjalan. Saban waktoe Anna poenja adjal ada ditoenggoe. Vronsky poelang ka roemahnja tapi kaesokannja di waktoe pagi-pagi sekali soeda dateng menanja-
