ladenin akoe poenja permintaän jang maoek soepaja ia bisa hargaken kahormatan dirinja sendiri! Orang bisa toeloeng satoe orang soepaja dirinja tiada masoek dalem djoerang kani- nsaän, tapi kaloe orangnja sendiri tiada maoe trima itoe pertoeloengan, maoe masoek djoega di itoe djoerang, dengen tiada merasa itoe sebagi katjilakaän, apatah laen orang bisa berboeat?"
„Banjak orang bisa toeloengin dirinja, katjoeali dengen pertjere'an."
„Banjak — katjoeali apa?"
„O, tiada, kasian sekali dirinja Anna! Tentoolah ia tiada bisa djadi istrinja siapa djoega? Ia bakal idoep tjilaka..."
„Akan tetapi apa akoe bisa berboeat?" tanja Karenine dengen angkat kadoea poendaknja dan keroetken iapoenja alis.
Atinja inget itoe pembitjaraän jang doeloe ia bikin sama Anna, bikin darahnja djadi meloewap, hingga sikapnja djadi seperti tempo ia pertama kali bikin itoe pembitjaraän.
„Akoe merasa berrterima kasi atas kau poenja katjintaän," kata Karenine. „Akan tetapi ada oeroesan jang penting 'koe moesti oeroes hingga sekarang djoega akoe maoe brangkat." Abis bilang begitoe ia bangoen dari tempat doedoeknja.
„Tiada, doedoek doeloe. Kau djangan tjerein dirinja. Denger, akoe nanti tjeritaken apa jang soeda terdjadi dengen akoe poenja diri. Akoe, seperti kau taoe, soeda menika, tapi akoe poenja soeami soeda berlakoe tjoerang. Dalem waktoe akoe goesar, dalem waktoe akoe tjemboeroean,
semoea akoe maoe tinggalin, semoea akoe maoe abisken... Itoe sadja ada djadi akoe poenja kehendakan, akan tetapi itoe semoea tiada sampe akoe lakoeken. Dan pada siapa akoe merasa bertrima kasih? Ja, Anna jang soeda toeloeng akoe poenja diri. Akoe poenja anak-anak djadi semingkin besar, akoe poenja soeami soeda bisa lawan iapoenja nafsoe ati, ia soeda liat perboeatannja jang kliroe, ia soeda toentoet pengidoepan jang pantes... Ini semoea akoe soeda liat dan boektiken. Akoe soeda ampoenin dirinja dan kau djoega moesti ampoenin dirinja Anna..."
Karenine dengerin Dolly berkata-kata, akan tetapi omongannja tiada bisa pengaroesin dirinja lagi. Amara jang timboel tempo ia ambil itoe poetoesan, kembali sekarang mengamoek dalem dirinja. Ia bangoen dari tempat doedoeknja dan bilang dengen soeara keras: „Akoe tiada bisa ampoenin, akoe tiada maoe berlakoe begitoe, akoe anggep kapan akoe berlakoe begitoe amat tiada patoet. Akoe soeda berboeat banjak bagi dirinja!... Akoe boekan orang jang bisa bentji orang dengen teroes meneroes... Akoe belon perna koetoek siapa djoega, tapi „dia" akoe bentji dan koetoek dengen akoe poenja djiwa. Akoe tiada bisa ampoenin dirinja sebab kabentjian akoe pada dirinja ada besar, berhoeboeng dengen kadoekaan jang ia telah terbitken bagi akoe poenja diri."
Badannja goemeter saking marahnja.
„Ampoeninlah orang jang kau bentji," kata Dolly dengen soeara perlahan.
