kau sama Karenine. Dengen tiada bilang apa apa lagi Oblonskij pegang tangannja dan toentoen ia di hadepannja Karenine.
„Apa akoe boleh adjar kenal kau orang satoe sama laen?” tanja ia tapi loepa seboetin namannja masing masing.
Akoe girang sekali bisa ketemoe kau kembali, kata Karenine dengen lakoe adem dan kamoedian sodorken iapoenja tangan.
„Apa kau orang soeda kenal satoe sama laen?” tanja Oblonskij dengen roepa heran.
„Kita taoe doedoek bersama sama di dalem trein sampe tiga djam lamanja!”
„Begitoe!” kata Oblonskij dengen soeara sedikit keras dan kamoedian bilang lebi djaoe: „Ajo, doedoek di medja, toean toean!”
Sehabisnja bersantap Karenine pergi ka salon.
„Akoe girang sekali jang kau dateng di sini”, kata Dollij dengen sakoenjoeng-koenjoeng, jang zonder diketahoei lagi soeda moendjoel di hadepannja Karenine. Akoe perloe mengomong apa apa sama kau, biarlah kita doedoek di sini.
Dengen paras jang tiada begitoe senang Karenine doedoek di sampingnja Dolly dan bilang:
„Atikoe merasa girang sekali jang sekarang 'koe bisa mengomong sama kau kerna tiada lama lagi akoe bakal pergi ka laen tempat dengen verlof. Besok akoe moelai melantjong...”
„Akoe telah tanjaken bagimana keada'annja Anna, akan tetapi sampe sekarang kau masi belon kasi djawaban. Bagiman dengen Anna?”
"Akoe kira ia ada dalem slamat", djawab Karenine zonder tengok moekanja orang jang menanja.
"Ma'afken akoe, sabetoelnja akoe tiada ada poenja hak aken menanja, aken tetapi lantaran Anna akoe pandang sebagi akoe poenja soedara sendiri, maka akoe maoe bikin pertanja'an jang sedikit melit. Dengen sanget akoe minta kau kasi keterangan, ada oeroesan apa jang bikin kau djadi begitoe mara sama Anna? Sala apa jang Anna telah lakoeken maka kau djadi begitoe goeser?"
Tempo denger itoe Karenine ampir meremin kadoea matanja dan kepalanja plahan plahan toendoek.
"Akoe rasa kau poenja soeami tentoe soeda tjerita pada kau, kenapa akoe poenja perhoeboengan sama Anna sekarang djadi beroba."
"Akoe tiada pertjaja! Akoe tiada bisa pertjaja, akoe tiada maoe pertjaja!" kata Dolly dengen soeara keras sembari permaen dengen iapoenja djari tangan.
Dengen sekoenjoeng koenjoeng Dolly bangoen dari tempat doedoeknja dan pegang tangannja Karenine, sembari bilang begini: "Di sini orang bisa ganggoe kita, baeklah kau ikoet akoe aken pergi ka laen tempat."
Nafsoenja Dolly jang begitoe besar aken dapet taoe lebi djaoe ini hal, bikin Karenine djadi terpaksa toeroet bangoen dari tempat doedoeknja aken ikoet Dolly jang pergi ka kamer bladjar dari iapoenja anak anak.
"Akoe tiada pertjaja, akoe tiada maoe pertjaja,"
