roessak, lantaran... lantaran..." Karenine mengomong begitoe tjepet sampe ia djadi tatatoetoe...
Boeat pertama kali Anna merasa menjesel dengen iapoenja perboeatan dan hatinja djadi merasa kesian sama Karenine. Akan tetapi apa ia bisa bilang sekarang dan apa ia bisa berboeat? Ia tinggal doedoek terpekoer sadja dan tra satoe perkata'an ia bisa oetjapken. Tatkala itoe poen Karenine tiada bilang apa-apa, akan tetapi sasoedanja brenti sakean lamanja ia moelain mengomong:
"Akoe dateng di sini boeat bilangin pada kau..."
Anna awasin Karenine dan bilang:
"Akoe tiada bisa bikin laen proba'an..."
"Akoe soeda dateng di sini aken kabarken pada kau," begitoelah ia mengoelangin omongannja, "jang besok akoe pergi ka Moeskou dan tiada kembali poela di ini roemah. Advocaat jang akoe soeroe oeroes perkara bertjere, nanti kabarken pada kau tentang akoe poenja poetoesan. Akoe poenja soedara prempoean nanti oeroes Serioja."
"Apa kau maoe ambil Serioja dari akoe poenja tangan?" tanja Anna. "Kau poenja perboeatan menoendjoekin jang kau maoe bikin akoe djadi lebi tjilaka. Biarin itoe anak sama akoe; kau toh tiada sajang Serioja?"
"Ja, katjinta'ankoe pada itoe anak soeda djadi ilang, lantaran akoe poenja pikiran inget kau poenja perboeatan boesoek. Biar bagimana djoega, itoe anak tiada bisa dikasiken pada kau."
Nou, slamat! Anna jang soeda nekat tahan.
„Itoe anak biar tinggal sama akoe!” begitoelah ia oelangin kembali omongannja. „Biar Serioja tinggal sama akoe, sampe... akoe soeda bersalin... Biarin ia tinggal sama akoe!...”
Karenine emposin tangannja Anna jang pegangin dirinja dan berdjalan dari itoe kamer zonder oetjapken satoe perkataan.
„Masoek toean,” kata satoe advocaat, jang Karenine minta pertoeloengannja akan oeroes iapoenja perkara bertjere. „Apa toean maoe doedoek di ini koersi?”
„Apa kau taoe siapa akoe ini?” tanja Karenine.
„Orang Rus jang mana sadja tentoe kenal toean,” djawab itoe advocaat sembari bongkokin badannja sebagi tanda membri hormat pada Karenine. „Siapa sadja taoe toean poenja pahala sama negri...”
„Akan tetapi seperti toean sendiri taoe,” kata itoe advocaat, „perkara begitoe biasanja dioeroes oleh padri dan itoe padri seringkali maoe tanjaken katrangan maséh boeat perkara jang bagimana sekalipoen” — iapoenja senjoeman menoendjoekin „apa” jang itoe padri soeka tanjaken.
„Betoel soerat-soerat bisa dimadjoeken sebagi katrangan atawa boekti-boekti, akan tetapi itoe pengadoean moesti dibikin dengen omongan, dengen laen perkata'an moesti ada saksi-saksi jang bisa kasi katrangan katjapoen;an demikian
